Uefa Champions League final lut pakhat a chiang ta a, Milan derby-ah Inter Milan-in AC Milan chu vawi hnih khelhah si thum faia hnehin final an lut ta a. Final-a an hmachhawn tur la chiang lo mah se Italian giants hian Real Madrid ai chuan Manchester City tum an châk zawk.

Nilaini zanah semifinal dangah City hian Etihad Stadium-ah Real an hmachhawn ve dawn a, khelh hmasakah 1-1 a inhnehtawkin an inching fel ve dawn a, Nerazzurri hmachhawn tur a chiang dawn.

Thawhlehni zana San Siro-a Lautaro Martinez-a goal thun hmanga si khat faia khelmual an tawmpui an hneh hnuah Inter vice president Javier Zanetti chuan duhthlan theih a nih phawt chuan June 9-a final khelh turah hian tawnhriat nei ngah tawh, Real chu hmachhawn loh a duh tih a sawi.

Inkhelh zawhah Zanetti hian Sky Italia hnenah, “Kum 13 hnua Champions League final kan lut leh hi a lawmawm a. Tu nge kan hmachhawn leh dawn? Real Madrid hi chu pumpelh hram ka duh, he intihsiakna hi an tana huaihawt ang mai a ni,” tiin champion ngun ber, Spanish club a huphurhna leh nomawi an lak ngun tawh dan a sawi.

“Eng pawh ni se, zinkawng thui tak kan zawh a. Semi-final-a derby khelh chu a harsa a, ka chungah a thleng tawh a, kan chak lo nghe nghe a ni,” tiin kum 10 liam taa a khelh ve laia an lo inhmachhawn tawh a sawi bawk.

San Siro-a mipui 76,000 chuang zet hmaa inkhelah hian Inter hian World Cup nomawi latu, Argentine striker goal thun hmangin hnehna an chang a. Martinez-a hi inkhelh pumah a langsar a, minute 74-a a goal thun nen Uefa-in Man of the Match-ah a thleng zui.

Thawhlehni zan inkhel hi kar hmasaa an inkhelhna khelmual tho ni mah se tun tumah hian Inter hi mual neitu zawk an ni ve tawh thung a, kar hmasaa mikhual chan an chan tum pawh khan si hnih faiin hnehna an lo chang tawh bawk.

Inter hian kum 13 liam ta khan Jose Mourinho hovin final lutin an champion zui a, hemi tum hian Serie A leh Italian Cup an la bawk a, nomawi pathum an la rual a ni.