Champions League atanga Newcastle United leh Manchester United tla hma chuan season thara Premier League-in club panga thawh theihna remchang tak an neih chu a tibuai mai thei.

Tun season-a che tha ram pahnihin season leha Champions League tihlen turah hmun khat ve ve an chang thei dawn.

Champions League group stage khelh zawh tak atang kha chuan Germany-a Bundesliga leh Italy-a Serie A ten hma an hruai a, England-in dawtin Spain chu palina a ni.

2024-25 Champions League-ah hian team 36 an tel tawh dawn a, tunah hian 32-in an khel mek.

Champions League hmelhmang thar tur

2003-04 season atang khan group phase-ah group riat awmin club pali theuh an awm a. Mahni mual leh mi dang mualah inkhel kual theuhvin vawi ruk an khel a, a sang pahnihin knockout stage an lut.

Season thar atang erawh chuan club 36 telin ‘Swiss’ format an tih hmangin an khel dawn a. Team tinin team hrang pariat theuh an khel vek ang a, vawi li an mual a, vawi li dang mi dang mualah an khel ang.

A sang team riatin knockout stage an lut nghal ang a, pakuana atang 24-na inkarten mahni mual leh mi mualah playoff an khel ang a, a chak team riatin an zawm veleh ang.

Hmun ruak thar changtu turte

Team 32 baka belhtu tur team li zinga mi pahnih hi tun season-a Europe-a che tha ram pahnihin an thawh tur a ni a. England, Spain, Italy leh Germany zinga miin an thawh dawn tihna a ni.

Tun season-ah English club-te hi che tha ta se season tharah Premier League-a panganain Champions League an khel dawn tihna a ni.

Uefa-in an hnuaia mite dinhmun a tehna, coefficient ranking an tih hi an hnuaia inelnaa club-te chet dan azira a tehna siam a ni a. Heta an dinhmun azirin hmun ruak pahnihin hi hnawh khah tur a ni bawk.

Ram pakhat atanga club telten hnehna an chanin point hnih, hnehtawkin point khat an hmu zel.

An thlen san dan azirin bonus point an hmu zel a, bonus hi Champions League-a thleng sangin an hmu tam a, a dawtah Europa, a dawtah Conference League a awm leh.

Ram khat atanga Uefa inelnaa tel zawng zawngte point hmuh chu belhkhawmin club an thawh zatin an sem leh a. Tunah hian England-in club pariat an thawh mek.

Season thara Champions League hmun ruak pahnih hi tun season-a che tha ramin an chan hnuah pahnih la ruaka pakhat hi coefficient ranking-a panga ni mek rama league-a pathumnain an chang dawn a. Ranking-a pangana ni mek hi Czech Republic an ni.

Hmun khat la chuang chu league champion-ten an inchuh tur a ni a. Team liin an inchuh thin chu season tharah chuan team nga an ni tawh dawn.

Newcastle leh United tlak hma nghawng

Season sarih liam ta chhung zawng kha chuan England hi hmun ruak awm ta se chang ngei tur an ni a; mahse, tun season-a hmun ruak inchuh tur a awm ber kiumah Champions League atangin Newcastle United leh Manchester United an tlak hma tak avangin Germany leh Italy an tluk lo mek.

Uefa inelna hrang hrangah Italy atanga inlan team sarihin group stage an paltlang vek a, Germany atangin Union Berlin chiah an tlang zo lo.

Spain-in Champions League atangin Seville chân mah se team ruk dang an la dam thung.

Manchester United leh Newcastle United hi an group-a a hniam ber ve ve niin Champions League atangin an tla a. Champion lai, Manchester City leh Arsenal an tlang thung.

Hetih lai hian Brighton, Liverpool leh West Ham chuan knockout stage an lut a, Conference League-ah Aston Villa an tlang bawk.

Season hmasaa Conference League-a Hammers an champion anga a la damten nomawi an la a nih chuan Premier League hi Champions League hmun ruak awm thar chang phakah an la inhung chhuak thei hlauh bawk.