Champion lai leh sulhnu nei tha an sawp a, kha thil kha a taka a thlen hma kha chuan huphurhawm tak a ni ngei ang. Mahse, Manchester City boss Pep Guardiola chuan chutiang chuan a lo thlir ve lo, an inkhelh hmaa a text message thawn pakhatah a lang.

Nilaini zanah Champions League semifinal-a Etihad Stadium-a Real Madrid an sawp hma lawk khan Spanish manager hian Manchester United captain hlui, Rio Ferdinand-a hnenah message a lo thawn a, an chak tur thu inringtawk takin a sawi.

“Pep-a’n min rawn text a, ‘Min ring rawh, kum hnih liam taah khan kan hneh tawh a, tunah pawh kan hneh leh ang,’ a rawn ti a, hei hi an inkhelh hma darkar hnih thum bak a ni lo, hei bak baka inringtawk!” tiin Ferdinand chuan a sawi.

“An khel han thlir khan an hrawkah an rah behsak a, an duhna hmun apiangah an awm a, a bak chu ‘goal’ a ni mai,” tiin Guardiola naute khelh dan a sawi bawk.

“He pa hi a pui lutuk! European football-a mi lian chu an thiat a, an sawp a, an nuai chhe vek a ni,” a ti bawk.

Nia, 2008-a Champions League nomawi lo la tawh, English defender sawi ang hian Etihad Stadium-a inkhelah hian a tir phat atangin mual neitu an chungnung a, Spanish giant hi team tenau ang chauh an ni mai.

Thibaut Courtois-a’n hna nei nghalin Erling Haaland-a tauh tha zet a dansak a ngai nghal a; mahse, minute 23-ah chuan Bernardo Silva a dang zo ta chuang lo.

A hnu lam phei chu ‘City hi engzatin nge an chak dawn?’ tih ngaihtuah a ni zui deuh tawh mai. Minute 37-ah Silva bawkin thun belhin second-half-ah Manuel Akanji leh Haaland thlaktu, Julian Alvarez ten an thun belh leh bawk.

Santiago Bernabeu-ah khan 1-1 in an inhnehtawk tawh a, Nilaini zana an chakna nen 5-1 zetin City an chak a, a vawi hnih nan Champions League final an khel dawn a, Istanbul-ah June 10 hian Inter Milan an hmachhawn ang.

City fakna a fawn vel a ni ber mai a. Blackburn leh Chelsea striker hlui, Chris Sutton chuan Inter lakah pawh khatianga an chet leh chuan nomawi an lak ngei a ring nghal hmiah mai.

“Thuneiha leh thununna dik tak an lantir a ni,” a ti a. “Champions League hi Guardiola a leh City duh a ni a. Khatianga an khel a nih ngat chuan final-a chak tur chu pakhat chiah a awm, rahbi pakhat chauh a ngai ta,” a ti.

Liverpool leh Real Madrid striker hlui, Michael Owen pawhin, “A tua-te pawhin top level-in an khel a, an manager a fing bawk a, nomawi pathum an lak loh chhan tur ka hre lo,” a ti hmiah.

Newcastle leh City goalkeeper hlui, Shay Given pawhin, “Treble a hnai zel,” a ti bawk.

City hian Champions League final an khelh hma hian nomawi pahnih lak theih an nei a. Pathiannia Chelsea an hneh chuan kum li chhunga a vawi thum nan Premier League-ah an champion dawn a, FA Cup final-ah United an hmachhawn zui ang.

Red Devils hi Premier League team zinga Treble thei awm chhun niin City hian an hnung zui theihna remchang tha tak an nei mek a ni.