Champions League semi-final khelh zan a ni ta.

Manchester City chuan champion lai leh sulhnu nei tha ber, Real Madrid an hma chhawn dawn a, Milan derby hmuh tur a awm dawn bawk.

City leh Real hi season hmasaah khan tun angah tho hian an inhmachhawn tawh a, minute 180 an khelh thleng pawha final luh inbeisei City kha a tawpah lunghnur takin an chhuak thung.

A zawna final an khelh theihna turin second tlem chauh a awm tawh tihah Madrid-in hun tawp dawnah goal hnih an thun a, extra-time-ah an thun belh zui a nih kha.

Tun tumah erawh kan hriat reng tur chu City hian season hmasaa an neih loh, Erling Haaland an nei tawh.

Inkhel dangah Inter leh Milan an la awm a, thawm nei lian lo zawk ni mah se khelmual pakhat, San Siro intawm an ni a, Milan derby boruak a nep ngai lo.

Champions League-ah hian vawi hnih chiah Milan derby khelh a la ni a, Milan-in hnehna chang ve vein kum 2003 semi final leh 2005 quarterfinal-ah Inter an hneh.

Tun tumah hian inkhel pahnihah hian eng nge kan hmuh ang le?

City kum a ni ve tawh ang?
Kum 10 liam ta chhung zawng kha thlir let ta ila, City hi Europe-a tlakhniam lai nei lo ber team an ni hial mai thei a; mahse, Champions League an la la miah lo thung.

Tunah hian tual chhungah kum ruk chhunga Premier League nomawi vawi nga nan leh 2011-12 hnua a vawi sarihna tur an beisei mek a, an dinhmun a tha tawh hle.

Kum thum liam ta chhungin semi-final an thleng ziah a, kum 2021 phei chuan final thlengin Chelsea an hneh lo va. Kum riat liam ta chhunga vawi khat mah an tih theih loh chu kum thum chhungin an ti thei.

Mahse, City hian Europe-a thiam ber nihna lallukhum tak erawh an la khum phak lo tluang zel.

2011-12 season atanga thlir letin, Chelsea leh Liverpool chuan Champions League-a an champion zat Premier League-ah an champion thei a. Blues vawi hnih leh Reds hi vawi khat ve an champion.

Pep Guardiola team tan hian tun ang tluka hun tha hi a awm lo tih theih a ni a, inkhel vawi 20 hneh loh nei lova kaltluang mek an ni a, kum 1999 hnu lama English team zinga a ruala nomawi pathum la thei dinhmunah an ding mek.

Guardiola hian nikuma Liverpool-in nomawi pali lak theihna remchang aia tha tunah hian remchang a nei niin a lang hial a. Jurgen Klopp-a team khan Champions League leh Premier League nomawi an la pha ta lo thung.

City chanchin sawia sawi lan loh theih loh chu Haaland a ni a, vawi 46 khelhah goal 51 a nei tawh a, 1927-28 season-a Dixie Dean-a’n Everton tan season tluana goal 63 a thuna English goalscoring record a siam chu a um mek.

Chanchinbua football lam ziaktu, Guillem Balague chuan, “Ani a awm hian team pumah nghawng a nei a. Long ball-ah an thatpui a, inkhel pawimawhah a thun thei si. Hun pawimawha langsar thei a ni a, City khelh dan pum hi a a tha zawngin a nghawng a ni,” a ti hial.

Julien Laurens pawhin, “An inpumkhat tha a, nikum aiin he team hian theihna an nei sang zawk tawh a. City kum tur angin a ngaih theih a, an Treble dawn niin a lang,” tiin an champion a ring hle.

‘Real nge nge’ kan ti leh zawk dawn em?
Europe-ah na na na chuan Real Madrid hi chu Real Madrid an ni, an danglam tlat.

Season kua liam ta chhungin Champions League nomawi vawi nga zet an la tawh a, hetih chhung hian La Liga-ah chuan vawi thum chauh an champion thei thung.

European champion an nih vawi nga zinga vawi hnihah phei hi chuan tual chhungah chuan pathumna chauh an ni phak.

Hetiang thlir hian Real hi tual chhungah rin ngam harsa mah se khawmualpui huapah chuan dah hniam theih an nih lohzia a lang a, tunah pawh pathumna niin hmahruaitu, Barcelona chu point 14 zetin an phak lo.

Semifinal atana an hlauhawm ruk riau theihna dang chu English team-te laka tawnhriat an lo neih that tawhna a ni bawk.

Tun hi knockout round-a a zawna Premier League team an hmachhawn vawi rukna tur a ni tawh a, tun season-ah pawh Liverpool leh Chelsea hneh tawhin season hmasaah tuna an hmachhawn tur hi an hneh bawk.

English team an hmachhawn hnuhnung vawi ngaah hlawhtlinna an chang vek a, heng zingah hian season hmasa final-a Klopp-a kaihhruai Liverpool an hneh pawh a tel.

Rafael Leao hun duhawm
Quarterfinal khelh dawn khan mi tam zawk chuan Napoli leh Milan inkhel ching feltu tur chu Victor Osimhen a nih an ring thup a; mahse, a tak takah chuan Rafael Leao a ni ta daih.

Kum 23 mi chauh, Milan striker hian Napoli an khelh vawi hnihnaah khan an lam penalty box pawn hret atanga ball a chan chu lehlam goal bul thleng a khalh phei a, Olivier Giroud-a tan siamsakin 2-1 in vawi hnih khelhah an chak phah.

An inkhelh hmasakah pawh a khel tha ber pawl a ni thei bawk a. Hei mai a ni lo, April thla tira Serie A champion ni ta laka 4-0 a an chak pawh khan goal hnih a thun tawh bawk.

Portugal international Leao hian tun hnaiah mi mit a la a, tun season-ah goal 13 thun tawhin a thiante tan goal 10 a siamsak tawh bawk.

“Football khawvelah hian ani ang hi an tam lo,” tiin Laurens chuan a sawi hial.

Leao-a hian Milan-ah season leh tawp thleng hun a la nei a, Chelsea chuan tun hnaiah an zui ngawrh hle tih sawi a awm.

Italian football ziaktu, James Horncastle chuan, “Milan thuneitute hian Leao hi talent nei tha bik a ni tih an hria a, amah pawhin awm zui a duh a, an tihfel thuai a rinawm,” a ti.

Balague pawhin, “Chelsea emaw, Manchester United-ah emaw a kal a nih chuan eng nge a chungah thleng ang? Ball a chawk thei ka hmu tawh a, inkhel rang takah pawh khel thei leh dan theih loh niin ka hria a, a thawh hlawk ang em ka hre lo,” a ti.

Lukaku a langsar ang em?
Romelo Lukaku-a’n Inter Milan a pan leh hi kawng hrang hranga thlirn a fuh lohna lai a awm.

Belgian striker hian 2020-21 khan Serie A nomawi lain Serie A player of the year a ni a, Chelsea a pan a, a tisual.

Nikum nipuiah loan-in a kir leh a; mahse, a che ropui thei tak tak tawh lo.

Tun season-ah goal 10 chauh a la thun a, Italy-a a hun hmasa kum hnihah erawh goal 64 zet a thun thei.

Laurens chuan, “Benfica nena vawi hnih an inkhelah khan a pawimawhin hun tawp dawnah penalty a chhuih lut bawk a. Mahse, bul a tan lo va, Lukaku hian bench atangin a en hmasa a, bench atanga a tih theih erawh a hnuah a lang,” a ti.

Balague chuan, “Tun dinhmunah chuan a pawimawh ber a ni lovin ka hria. Inrintawkna a tlachham a, insiam that leh a ngai a, Chelsea-ah a nih a ngai tawh mai thei,” a ti.

Inter tana tun season-a goal thun tam ber chu Lautaro Martinez niin goal 23 a nei tawh a, Edin Dzeko-a’n goal 13 a thun tawh bawk.

Horncastle chuan, “Lukaku hi Chelsea khelh danah khan a leng lo va, khatiang tho kha Inter-ah pawh a ni bawk. A inhliam a, World Cup a khel leh a, a thil tawn hi Dzeko nena an inkara tha zawk ni turin a siam lo a ni,” a ti.