Manchester United, Newcastle leh Celtic tan tun kara Champions League khelh chawlhkarah hian knockout stage lut turin an beiseina tihnun thar lehzualna hun an nei mek.

Club pathumte hi tun kara group stage khelh turah hian result tha an nei lo a nih chuan tla vek thei an ni mek.

Hetih lai hian Arsenal chuan Nilaini zana Lens an hmachhawn hunah an tlawm lo a nih chuan a thiam 16 zingah an tel dawn a, inkhel miah lo pawhin an hmaa khelah Sevilla-in PSV Eindhoven an hneh hlauh phei chuan an tlang der thei.

Champion lai, Manchester City chu RB Leipzig, Bayern Munich, Inter Milan, Real Madrid leh Real Sociedad te nen an tlang chiang tawh thung.

Group pariata a sang pahnih zelin knockout stage an lut dawn a, pathumnain Europa League an khel zui ang.

Tute nge tling thei hnai, tuten nge thil mak a thlen nghah ngai?

GROUP A

Bayern Munich chuan khelh hnuhnung bera Galatasaray an hneh hnuah khelh hnih la bakin a sang ber ni chungin knockout stage an lut tawh tih a chiang.

Hetih lai hian Manchester United, FC Copenhagen leh Galatasaray ten a thiam 16 zinga tel theih inbeiseina an la nei theuh.

United hian Nilaini zanah Galatasaray an hmachhawn dawn a, an chak lo a nih chuan an tla dawn.

Red Devils hi an tlak leh tlang chu ‘an kutah a awm tawh lo’ tih theih a ni a. Khelh hnih an la neihah an chak ve ve a nih pawhin FC Copenhagen-in hnehna an chang ve ve a nih bawk si chuan Erik ten Hag-a team hi an tla dawn tho.

GROUP B

Arsenal-in Nilaini zana Emirates Stadium-a Lens an hneh chuan a sang ber ni chungin an tlang dawn a, tlang turin Gunners hian tlawm loh chiah an mamawh tawh bawk.

Mikel Arteta-a team hi Nilaini zana an khelh hma hauh pawhin anmahni aia khel hmasa tur, Sevilla-in PSV Eindhoven an hneh hlauh phei chuan an tlang der thei bawk.

PSV, Lens leh Sevilla te hi knockout stage thleng thei dinhmuna la ding an ni vek bawk.

GROUP C

An khelh hnuhnung bera Sporting Braga an hneh hnuah khan Real Madrid chuan a zawna season 26-na atan knockout stage an lut fel tawh.

Mi dang pathumte chu chhiarkawp danin a thiam 16 zinga la tel thei vek an ni a. Napoli chuan Nilaini zanah Real Madrid hi an hneh chuan an tlang ang.

GROUP D

Real Sociedad leh Inter Milan ten knockout stage an lut ve ve tawh a, thil a danglam thei tawh lo.

Khelh hmabak pahnih ve ve an neih hi an group-ah tu nge sang zawk ang tih fiahna tur chauh a ni tawh a. A hniam pahnih, Red Bull Salzburg leh Benfica te chu tu zawk nge pathumna nia Europa League khel zui tur inchuh tur an ni bawk.

GROUP E

2012-13 hnua a vawi khat nana knockout stage thleng turin Celtic-in result tha an mamawh tak zet.

Scottish champion hian Feyenoord leh Lazio an hmachhawn hunah chak ngei ngei an mamawh a, Italian club lakah phei chuan goal hnih tal an thun a ngai a. Hei mai a ni lo va, an hmachhawn tur pahnih leh an group-a awm dang, Atletico Madrid an chak loh a la ngai bawk.

Celtic hi Group E atang hian group stage inkhel hnuhnung ber khelh hmaa tla thei awmchhun an ni mek bawk.

GROUP F

Thawhlehni zana Paris St-Germain an tlawh huna an tlawm a nih chuan Newcastle United tan a thiam 16 zinga tel ngaihna a awm tawh dawn lo.

Magpies hi Borussia Dortmund laka vawi an tlawm tawh avangin head-to-head-ah an hniam sa nghal a; mahse, PSG hi an hneh hlauh a nih chuan Eddie Howe-a team hian khelh hmabak an la neihah pahnihna nia tlang theihna remchang an nei thei dawn thung.

GROUP G

Khelh hnuhnung bera Young Boys an hneh hnuah Manchester City chu khelh hnih la nei chungin a thiam 16 zingah an tel chiang tawh.

Hetiang bawk hian an elpui, RB Leipzig chuan Red Star Belgrade an hneh hnuah knockout stage an lut ve bawk.

Thawhlehni zanah Etihad Stadium-ah City hian Leipzig hi an mikhual dawn a, an hneh a nih chuan khelh khat la bak chungin an group-ah a sang ber an ni dawn tih a chiang nghal ang.

GROUP H

Khelh hnuhnung bera Shakhtar Donetsk laka point an hlawh chhuah loh avang khan Barcelona chu kum thum chhunga a vawi khat nan knockout stage thleng lova tla thei an ni mek.

Hetih lai hian vawi nga champion tawh hian Thawhlehni zanah FC Porto an hneh a nih thung chuan khelh khat la nei chunga tlangthei an la ni tho bawk. Porto leh Shakhtar hi group stage inkhel hnuhnung bera inhmachhawn tur an ni a, tlang theihna remchang an la nei ve ve bawk.

Royal Antwerp erawh an tla fel tawh a, Belgian champions hi an khelh hmabak pahniha an chaka Shakhtar vawi khat an chak lo a nih chuan Europa League-ah an inlan zui thei thung ang.