Kohhran leh ministry angin tuallai rawngbawlna neih a ni awllo a, anmahni nun a thawktu leh tur tlattu a awm avanga tuallai a chanchin tha au pui a, thahnemngai em em a Isua tana pen chhuak mimal, thalai atanga kum upa lam thlengin an awm bawk. Chu chu Aizawl bakah Mizoram hmun hrang hrang a thil thleng thin leh thleng mek a ni.

Hetianga mimal a chanchin tha thu tlangaupui a, khawlai hmun lunlai a hun hmang thin zingah an mamawh tawk microphone te nen a thawk chhuak mek te pawh an awm a, a tam zawk erawhin sound system hmang loin, an awrawl tawp chhuahin, thahnemngai takin chanchin tha an au pui a, en mai pawhin 'an zak ve deuh thin a nih hmel' tih tur, kum lama la naupang tak tih hriat te pawh an awm a, mahse, anmahni a thawktu leh turtu thu an ngaihchan zawk vanga chanchin tha tlangaupui an nih avangin, an thuhril mualpho pui an awm ngai lo!

Kristian ram kan ni a, Biakin chhung leh kohhran rawngbawlna peng hrang hrangah chanchin tha puan tamna ram kan ni, a la ni zel bawk ang! Tuallai rawngbawlna lamah pawh kohhran leh chanchin tha puang tura a bik taka din ministry hrang hrangte an inhawng zau zel niin a lang bawk.

Rawngbawlna hautak zet mai, chak vang leh phur vang a tih ngawt theih loh tuallai rawngbawlna hi kristian ni lo, hnamdang te mit hmuh pawh a mawi em em, rawngbawlna hautak zet, thlarau thianghlimin a luah hneh em em te tan lo a 'tih ve mai theih loh leh tih chi loh' a nih avangin, hetianga awrawl tawp chhuah a Isua chanchin tha au pui thin tute leh au mek te hi langsar taka Kristianna chawisangtu leh chawinungtute an ni a! Van lam ngaihdanah an thawm a ring thin ngawt ang le!!