Chanchinbumite vuina

Admin - Jul 18, 2021

Chanchinbumite vuina

Tunhnaiah Mizorama chanchinbu inzawmkhawm pawl Mizoram Journalists’ Association chuan ramri chungchang sawihona ah Press mite luh an phal loh avangin an lungawi lo hle a, general body meeting neiin sawrkar laka an duhkhawplohna te an auchhuahpui a. Press mite lungawilohna hian sawrkar beng pawh a thleng ngeiin a rinawm a, hei hian rahtha chhuah ngei se a duhawm hle.

Mizoram hi state ralmuang a ni a, sawrkar leh Press mite pawhin thawhdunna tha tak an nei a. India ram State zingah Mizoram tluka sawrkar leh Press mite thawhhona tha a awm lo hial awm e. Sawrkarin thupuan tur tul leh pawimawh a neih chuan Press mite pawhin a theih ang angin an puanzar sak a, sawrkar lam pawhin a theih ang angin a duhsak let ve bawk. Mi thenkhat phei chuan sawrkar leh chanchinbumite thawhhona hi a tha lutuk zawk nia hriain an ngaimawh thu an sawi hial a ni.

Tunhnaia chanchinbumite vuivaina hi a tha zawngin sawrkar hian dawngsawng se a lawmawm khawp ang. Ramri chungchang leh thil pawimawh dangah te pawh sawrkar hian Mizoram media te hi a hmang tangkai tawk lo hle niin a lang a. Tunhnaia ramri buai chungchangah pawh kan thenawm state te chuan hma an lak dawnin Press mite an hruai a. State dangte nen inbiakna an neih pawhin an media te hruaiin anmahni tana tha tur ngei nia ngaih zawhna te an zawt thin a. National media thlengin an hmang tangkai em em a ni. Hetih lai hian Mizoram sawrkar thuneitute erawh chuan Press mite zawhna hi an chhang tha duh lo (?) a, hei hian chanchinbumite pawh ti hrilhhai hle thin a ni.

Chanchinbumite vuivaina chungchangah hian sawrkar hian nu leh pa chan changin puitling takin lo dawngsawng se, inenlet leh insiamthatna tur awmah pawh a tul angin hma la hram se a duhawm hle. Ramri chungchangah hian Mizoram chanchinbumite hian an phak ang tawk tawkin thahnem an ngai a ni tih hriain an vuivaina hi thinrima la lovin inenlet nan hmang thei se a duhawm hle. 

Share now