Thlaah zan a ni tan leh ta a, Indian space scientist-te chuan an Moon lander tirh chu kaihthawh beiseina ‘a tlem lehzual ta hle’ tih an sawi.

Indian space agency, Isro chuan biakpawh an tum zui zel dawn em tih a sawi chiang lo va, thlaa lander leh rover an tirh hian ‘an tih tur zawng leh a bak pawh an ti tawh’ tih erawh an sawi.

Isro hian Vikram lander hi September 22 leh a hnu lam, thlaa ni a chhuah leh huna kaihthawh leh theih an beisei kha a ni.

Thlaa chhun leh zan hi leia ni 14 chuang hret ve ve a ni.

Lander hian a dulah Pragyaan rover a pai a, Moon leilungah hian ram dangten an la tlawhpawh ngai mang loh, chhim tawp lam hnaihah August 23 khan a tum a. Chawlhkar hnih chhung thlaah hun hmangin data leh thlalak an la khawm a, ni a tlak ruakin ‘muttir’ an ni zui.

Thlaa tum hun hi uluk taka duan lawk niin ni a chhuah hunah \umtir a ni a, hei hi an battery-te a in-charge-a tha taka hna an thawh theih nan a ni.

Indian Space Research Organisation (Isro) chuan lander leh rover hian leia ni 14 an dam thei tih an sawi a; mahse, a hnuah a battery-te chu in-recharge-in ni a chhuah leh hunah kaih thawh leh theih an inbeisei thar a ni.

An muttira ni a chhuah leha kaih thawh an tum leh hnuah erawh lander atang hian signal an dawng thei ta lo tih scientist-te chuan BBC an hrilh a. “Hun a liam zel avangin beiseina pawh a tlem zel,” an ti.

Zirtawpni khan Indian space agency chief thin, G Madhavan Nair chuan ‘Vikram lander-in engmah biakpawh a chhan theih tak loh atang khan tunah chuan kaih thawh leh theihna chance hi a chhe tawh tak zet’ tiin BBC hnenah a sawi.

“Thlaa zan khaw vawt tak, -200°C to leh 250°C inkara dam chhuak zo tur khawpa duan a ni lo hrim hrim bawk,” a ti.

India-in thlaa inkah kai a tum hmasak ber tuma an hotupa, Mylswamy Annadurai pawhin ‘Vikram lander biakpawh tum hian beih zui zel a ni’ tih a sawi a; mahse, a theih dawn loh a ang ta niin a sawi.

“Kai tho leh turin hmanrua leh theihna kan nei zo tawh lo va. Ni zir chiang tura tirh hmasak ber, Aditya L-1 kawng zawh lam kan thlir tawh ta zawk a. Tunah chuan Aditya hian ngaihven a mamawh a, chu lam chu kan hawi a ngai tawh a ni,” a ti.

“Chu chu kan pawma kan hawi mai a ngai tawh,” a ti bawk.

Isro hian a thil kah chhuahte thlaa an awm chhung hian regular takin an thlen chin, an awm dan leh an thil hmuhte a tichhuak reng a, thla a lakte pawh a tlangzarh reng bawk.

Thlaa an thil tirhte hian an tih tura an tuk zawng zawng an ti vek niin an sawi tawh bawk a. Ni rei vak lo liam taah khan Chandrayaan-3 project director P Veeramuthuvel chuan ‘lander hian thlaah hian ruahman lawk loh thlengin a ti a, ti tura tih piah lam thlengin a ti tawh zawk a ni’ tiin a sawi tih India Today chanchinbu chuan a tar lang.

India hian Chandrayaan-3 mission hmang hian record tharsiamin thla chhim tawpa boruaklawng tumtir hmasa ber a ni.

Khawvel ram ropui tak tak - US, Soviet Union leh China hnung zuiin thlaa inkap kai thei ram a ni ta bawk.