Mizote Kut neih zinga ngaihhlut hlawh ber Chapchar kut chu tluang takin kan hmang zo leh ta a, puanzarna lam a that avangin mipui pawhin kan hlut hle. Chutih rualin kumdanga kan hman lehzelna turah thil tihdan tha leh felfai zawk kan ruahman thiam a pawimawh dawn hle mai. A hmasa berah chuan hmunhma tha kan ngaihtuah a pawimawh ang. Tun dinhmunah chuan Lammual hi kan hmun neih that ber leh neihchhun a ni hrih a, hei lah hi Assam Rifles thuhnuaiah a awm avangin duh hun hunah hman theih a ni lo va. Chumai bakah Football khelhna atan phullem phah a nih avangin dim a ngai bawk si a. Hmunhma tha, mipui tam zawk dawlzo tur hi tih tak zeta sawrkarin a ngaihtuah a ngai a ni. Nagaland in Hornbill festival an hmanna ang deuh hmunhma tha nei thei ila a duhawm hle. Kumdangah chuan Lammual ah Kut hi kan hmang leh dawn a nih chuan traffic kalphung felfai zawka ruahman a pawimawh. Mipui kan tam avangin lirthei tan chet a harsa a, hun rei tak tak chhung traffic jam vangin lirthei an che sawn thei lo va. Kangmei, rikrum thil leh damlohna thilah damdawiin panpui ngai pawh awmpalh theih a ni a, chet ngaihna a awm dawn lo tihna a ni. Kum eng emaw chen chu Krismas leh kumthar vuakvetah ‘No Vehicle Zone’ siamin mipui te zalen takin an bazar thin a, hei hi sawrkar pawhin chhunzawm zel tlakah a ngai a. Hetiang deuh bawk hian kumdangah chuan Dawrpui (Millennium Centre) atanga Dakin pui inkar te emaw hi No vehicle zone ah siam nise lirthei leh mipui chetvel a awlsam phah sawt ang. Chumai ni lovin Lammual leh a chhehvelah Mizo thil Artui, Thingpui sen, Chhangban, Kurtai leh thildang te zawrh ni ta bawk se Kut hi a tihlu lehzual ngei ang. Kut programme duan kawngah tih danglam ngai thenkhat a awm niin a lang a. Ground chhunga programme awm/neih tur ang angte Cheraw, Sarlamkai leh a dangte hi hlawmkhat deuhin dah nise, chawhma lamah te entir ta ila. Chawhnu lam chu zai leh thildang, stage atanga tih theih chi ang te tihna atan hman ni tase programme a felfai deuh ang. Tun tumah kha chuan field chhung atangin mipuite chhuak tura ngen an ngai fo mai a, hun tam tak kan khawhral a, a fuh chiahlo niin a lang. Thil lawmawm tak chu kan hnam incheina leh Kut kan hlut chho zel hi a ni. Kut ni chauh nilo a hma ni te pawhin sawrkarin Mizo thuama inbel turin ngenna a siam a, mipui ten kan zawm tha hle. Zo thuam hi a mawiin hnamdang zingah pawh mit la tak a ni a, kan hlut a pawimawh. A hlut tu tur ber ten kan hlut loh chuan hnamdangin min chawilar sak dawn lo a, Mizote hi a chawilartu tur chu kan ni.