April 12, 2024; Nungcha chilhlum hreh vanga nunna chan ta, Tv. Lalrinchhana (37) S/o H.Lalnunsanga, Kawrthah khua chu Mizoram District hrang hranga Honorary Wildlife Warden-te chuan amah ralna leh chawimawina thuziak cheimawi vawiin khan an hlan.

Tv. Lalrinchhana hi Kawrthah khua Darchhûng Motor Workshop neitu niin Rengdil khuaah Motor chhe siam tur a awm avangin, Ni 5/4/24 khan an kova, chawhnu dar 1 velah Kawrthah aṭanga chhuakin an mahni Car-in, Lalthanpuia (a nu nau fapa) nen Rengdil an pan a, Ramrikawn/Perngo kawnah kawng ṭha leh ngil lai takah an tlan laiin an hmaa Sanghar kawngpui kâna a lo tlan chu chil a hlauh vangin a hel a, a helna lamah tuihawk luankawr (Side drain) ah tla lutin a motor ke pawh a chhe nghal a, an chetsual phah ta a ni.

Tv.Lalrinchhana hi a hmu hmasatuten bawihsawmin Kawrthah Hospital panpui nghal a ni a,a chet sual ni tlai lam dar 3:30 ah a boral zui ta a. A ruang hi lumen a nih hnuah Ni 6/4/2024 khan Kawrthah thlanmualah vuiliam a ni.

Hetianga Tv.Lalrinchhana'n Nungcha tihhlum duh loh vanga nunna hial a lo chan ta hi Mizoram hmun hrang hranga District Honorary Wildlife Warden te chuan pawi an tiin amah chawimawina thuziak leh ralna sum chu Lalmuankima Khiangte, Mamit District Honorary Wildlife Warden chuan Kawrthah khua a an chenna In ah vawiin khan a hlan a, Kawrthah khuaa DFO Staff te leh Branch YMA hruaituten an tawiawm a ni.