ZALEN, August 23, 2026: Vawiin chawhma dar 9:30 vel khan Bipin Kumar Chakma (45) chu a nupui Lokhi Mala (38) chuan chempuiin a sat hlum.

Thudawn danin, Bipin Kumar-a te hi Chawngte C-ah an chhungkuain zu (a senchi leh beer) zuarin an cheng a. Tunhnaiah Silchar-ah zu la turin a kal a, mi tu tih hriat loh ten an kidnap a, a pawisa leh zu te an lak sak vek niin a chhungte hnenah a sawi.

Vawiin khan Silchar atangin a fapa nen Chawngte C ah hian an haw a, an in luah an luh hlimah tualthahna hi a thleng niin thu dawnna chuan a sawi.

Lokhi Mala-in a pasal chempui nena a beih thawm hriain thenawmte an rawn tlan khawm a, Lokhi Mala leh a fapa Mehery Chakma chuan mipuite chu lut lo turin an lo vau a. Police hrilh nghal niin, police an thlen hian Lokhi Mala chuan chempui lo la kengin an chhuhsak a ni.

Police an thlen hian Bipin Kumar chu a thi fel tawh niin thu dawn a ni. Lunglei FSL pawh pawikhawihna hmun hi an thleng ve nghal a, tualthahna hmun atanga evidence pawimawh turte la khawmin enfiahna an kalpui nghal bawk.