ZALEN January 29, 2026 : MIFCO Chairman Lalthazuala Rawite, chuan vawiin khan Chawngtlai khua tlawhin Sapthei chingtute leh khawtlang hruaitute a kawm a, an khawtlang mipui enzawnna pui ber Sapthei hralhna kawngah buaina an neih lohna turin MIFCO chuan theih tawp a chhuah dawn a ti.

Chawngtlai khua Sapthei chinna hmun hmunte tlawh nghalin Lalthazuala Rawite chuan, "Chawngtlai khua hi Mizorama Sapthei ching nasa ber khua an ni a, Sapthei thar a nih hunah a thar vanglaia harsatna an tawh lohna turin MIFCO chuan rate tha tak hmanga leisak turin ruahmanna kan kalpui mek a, MIFCO-in a leina tur zat tunah bituk nghal thei lo mah ila kut hnathawktuten man man taka an hralh theih nan hma kan la dawn a ni. Sawrkar flagship-a thlai thar lei tur zingah tel ve lo mah se, Sapthei leh Lakhuihthei te hi sawrkar chuan kan ngai pawimawh a, heng thei pahnih chingtute tihbeidawn kan tum lo. MIFCO kaltlangin sawrkar chuan nasa takin hma a la mek a, MZU te nen pawh tang tlangin a tui sawr mai ni lo, sweet (chithlum mum) thlenga siam tum a ni," a ti. 

MIFCO Chairman chuan, "Awmze nei zawka eizawnna mipuiten an kalpui theihna turin sawrkarin hma a la zel a, a pawimawh ber chu rinawmna leh taimakna a ni. Sapthei leh Lakhuih chingtute in rinawm chuan in lakah pawh kan rinawm ang," a ti bawk.

Sapthei Association, Chawngtlai hian kum kalta 2025 khan Sapthei quintal 1,500 vel an tharchhuak a, kumin hian tam zawk thar an inbeisei a, Sapthei an chinna hmun panna kawng link road siamthat a ngaih tawh thu an sawi. Chawngtlai khuaah hian chhungkua 404 awmin Sapthei chingtu chhungkua 247 an awm mek a ni.