Nizan khan champion lai Zarkawt BCA chuan Play In khel turin an la tling tawk tih lantirin tun MSL-a hneh la neilo team Chawnpui BC lakah point 105 an thun. R. Dengțhuama Indoor Stadium-a Mizoram Super League (MSL) season 7 khelh mekah point 76 thuntu Chawnpui BC tan erawh a sang pali te khelh tur Play In khelh phak a beiseiawm tawh lo. 
 
Foreigner leh State pawn player nei lo, Mizo hlanga khelh Chawnpui tlangval tan Zarkawt BCA foreign player Joseph Frederick Allen leh Aaron Varghese Blessen te an lian hret a, pumruaw san mamawhna game a nih angin an khanlo hret a ni. Allen hian point 32 zet a thawk chhuak a, Blessen-a'n point 14 a score bawk. India camp-a awm tawh leh MVP Lalrina Renthlei a che tha leh pek a, point 20 a thun. Zarkawt BCA hian khelh 5-ah vawi 4 chak tawhin Tuikual South lakah chiah an la tlawm a, point 9 (Chakin point 2, chak lohin point 1) neiin table hmahruaitu an ni.

Team huaisen Mizo hlanga khel Chawnpui BC hian an khel chhe hran lova, point pawh 76 zet an score thei. Tum nga khel tawhin chak an la nei lova point 5 nei mekin table mawngphahah an awm mek. Chawnpui BC tan R. Lalmuanpuia leh Lallianmawia ten point 19 ve ve an thawk chhuak a, Laltlanhlua'n point 14 thunin Vanlalhriatpuia'n point 11 a nei ve bawk. 

Zarkawt BCA lam hian inkhelh tantirh atangin ro an rel nghal a, quarter hmasa berah hian point 27 zet an thun laiin Chawnpui lamin point 16 chiah an thun thei. Quarter hnih-naah an lut thei zual a, 33-15 zetin hnehna an chang leh. Chawlhlawk hmain BCA lam hian point 60 zet an thawkchhuak hman a, Chawnpui lakah point 29 zetin hma an hruai. 

Chawlhlawk zawhah Chawnpui lam rawnin siamtha hretin point 19 an rawn thun a, mahse Zarkawt BCA lamin an hlahthlem duh bik lo point 22 thunin third quarter-ah 22-19 in hnehna an chang leh. Fourth quarter-ah Zarkawt BCA an inthlahdul a, Chawnpui BC an inthlahdah ve duh lo. Quarter hnuhnung ber chu lak ngei tumin an bei a, hun tawpah chuan 26-23 in hnehna an chang thei ta.

Zanin dar 8 hian Khatla TBL leh Chanmari Vikings ten Play in khel turin fiahna an hmachhawn ve thung ang. 

                         Total/ Period 1/ Period 2/ Period 3/ Period 4 
Zarkawt BCA : 105         27          33            22           23 
Chawnpui BC : 76          16          15            19           26

Zarkawt BCA
Joseph Frederick Allen - 32 pts - 14 rebounds -3 assists.
Lalrina Renthlei - 20 pts - 1 rebound - 5 assists - 1 steal.
Aaron Varghese Blessen - 14 pts - 4 rebounds - 1 block - 1 assist - 1 steals.
Zonunsanga- 12 pts - 2 rebounds - 4 assists - 3 steals.

Chawnpui BC
R. Lalmuanpuia - 19 pts - 4 rebounds - 5 assists.
Lallianmawia - 19 pts - 3 rebounds - 4 assists.
Laltlanhlua - 14 pts - 2 rebounds - 1 assist.
Vanlalhriatpuia - 11 pts - 3 rebounds - 1 assist.