Zote Honda Mizoram Premier League, Season 9 Round 11, AR Lammual-a inkhelh tum hnih awmah chak zawk an awm lo ve ve. October ni 4, zirtawpni inkhelh hmasa zawkah Mizoram Police FC leh Chhinga Veng FC te chu 1-1 in an inhneh tawk a, inkhel hnuhnung zawkah Aizawl FC leh Chawnpui FC te chak zawk awmlo in 1-1 bawkin an inhnehtawk.

Inkhel hmasa zawk Mizoram Police FC leh Chhinga Veng FC te hian point 1 ve ve an hlawh chhuak a, point khat chauha inthlauin table-ah an awm zui. Chhinga Veng lam hian first half minute 29 na lekah penalty hmangin goal hmahruai an thun a, second half minute 53 naah Police lam hian an si phurh sutin goal a lut zui lo. 

Chawhma dar 11:30 nisa hnuaia inkhelah hian team pahnih te an in chai tawkin an fimkhur dun hle a, goal lamah erawh an hlauhawm lutuk lo ve ve thung. Team hnih te hian chance nei ve bawk mahse goal-ah an chantir thei lo va, police tana midfielder Biaktea goal hlah erawh a uiawm tak zet. 

Chhinga Veng lam pawhin counter atangin an nawr zauh zauh a, minute 29 naah penalty an hlawh chhuak hlauh a, forward Vanlaltluanga hmangin an goal khatna an khung.  Chhinga Veng lam hi phur thar viau mah se goal hlauhawm an nei zui lem lo. 

Second half tan a ni a, team lian leh si phur zawk Police an chungnung deuh in a lang a, an goal khatna leh an siphurh sutna chu  minute 53-naah Sawmfela’n a thun. He goal hi mual sir lam atanga Biaktea siam sak a ni. Huntawp dawnah Valpuia’n uiawm takin a hlah a, goal dang luh belh lovin an in hnehtawk. Point 16 neiin Police hi table-ah pahnihna an ni mek a, palina niin Chhinga Veng hian point 15 an nei mek bawk. 

Inkhel hnuhnung zawk hi chawhnu dar 2:30 ah tan niin Chawnpui FC chuan I League club leh MPL hmahruai mektu Aizawl FC an chelh a, 1-1 a inhnehtawkin point khat ve ve an hlawh chhuak. 

Player nei tha zawk Aizawl FC lamin inkhelh tan phat atangin an nawr nghal a, goal hlauhawm pawh nei zauh zauh mah se an duh ber goal erawh an thun thei mai tlat lo.  Midfielder Ramdina goal shot tha zet Chawnpui keeper Lawmzuala lo dan sak chu AFC tan chuan a uiawm tak zet. 

Aizawl FC hian game 10 khel tawhin point 23 hmuin hma an hruai mek a, Chawnpui lamin point 15 an nei thung. 

Second half-ah pawh goal a lut mai lo. Chhanhima’n minute 62-naah Aizawl FC hmahruaina goal freekick atangin mawi takin a pet lut a, 1-0 a ni. Minute sawm a liam tihin Chawnpui lamin freekick an hlawhchhuak ve thung a, Mca’n chhuihin an siphurh mek chu freekick atang vekin a rawn sut a, goal dang a luh belh lo.