Tun hnaia Manchester City sawi nan khawthlang hovin ‘unstoppable’ tih an hmang fo va, ‘chelh rual loh’ tia Zotawnga sawi hian a fiah ve tho mai.

Nia, City chet dan em em hi chu ‘chelh rual loh’ an ni chiang rih khawp mai a, nomawi pathum hi an la rual lo vang tih sawi a har ta khawp mai.

A ni leh, a chunga thlalak hi tunge a nih kan hria em? Chik deuh chuan kan hre mai thei, Italian coach Cristian Stellini a ni a, Antonio Conte thachhangdawltu thin a ni a, ani kan han tar lan chhan hi chu a ho angreng khawp a, ‘chelh rual loh City’ hneh thei hnuhnung ber coach a nih rih vang mai chauh a ni.

Stellini-a’n City a hneh pawh hi hun a liam leh ta fu mai a, February 5, 2023-a Conte-a Tottenham Hotspurs manager a nih laia a phing an zai lai khan a ai a lo awh a, a kaihhruaina hnuaiah hian Harry Kane-a goal thun hmangin Premier League-ah si khat faiin Pep Guardiola team an hneh a ni.

Hemi hnuah hian Citizens hi an la tlawm leh ta miah lo va, Nilaini zana Etihad Stadium-a Real Madrid an sawp thleng khan vawi 23 zet chu tlawm hmel an hmu tawh lo.

Inkhel vawi 23-ah hian vawi li erawh hnehna an chang zo bik lo va. League-ah Nottingham Forest nen 1-1 a inhnehtawkin Champions League lamah RB Leipzig, Bayern Munich leh Real Madrid te chu 1-1 theuhvin an hnehtawk a, heng inkhel pali hi mikhual zawka an tanna vek a ni nghe nghe.

Guardiola team hi Premier League-ah phei chuan February 18-a Forest nen an inhnehtawk hnuah khan vawi 11 inkhel tawhin hnehtu zawkah an la tang fai vek bawk.

Tunah hian Champions League leh FA Cup final an la hmabak a, league-ah Pathianni zana Chelsea an hneh chuan an champion dawn bawk a, nomawi pathum an hnaih ta khawp mai.

Anmahni hneh thei hnuhnung ber, Stellini hi kum 2011-a Conte-a’n Juventus a enkawl lai atanga inzui tawh an ni a, thamna thubuaia hrem a tawh leh team dang enkawl ve zeuh nei mah se Inter Milan-ah an inzui leh a, London-ah Spurs an thleng dun.

City a hnehpui hma hian 2022–23 Champions League khan group stage inkhel hnuhnung berah Conte damloh vang thovin Marseille a hmachhawnpui a, hei hi a kaihhruaia Spurs inkhelh hmasak ber niin France-ah hnehna changin knock-out stage an luh phah tawh bawk.

March 26-a intihlungawi lohna neuh neuh neia Conte-a’n Tottenham a chhuahsan khan a aiawh turin tih a ni a. Vawi thum khelhah a chet thatpui tak loh avangin season tawp thleng atana inruai ni mah se Ryan Mason-a’n a thlak leh ta a ni.