Emerson Palmieri chuan Chelsea chhuahsanin London club tho leh an hmelma West Ham a zawm. Stamford Bridge lama Champions League leh Europa League chawi tawh Italy defender hi kum 4 a cham ang. 

Italy left-back Emerson Palmieri kum 28 hi London Stadium lamah 2026 nipui thleng a cham dawn a, a duh chuan a pawtsei thei dawn bawk a ni. Stamford Bridge atanga chona thar hmachhawn duh defender hian West Ham lamah medical pawh a nei tawh a, a manah pound maktaduai 15 an pek a ni.

Brazil rama piang Emerson hian kum 2014 khan Italian football a luhchilh a, kum thum hnuah Italy khua leh tui nihna (Italian citizenship) pek niin ram tan a khel nghal. Italy tan tum 27 khel tawhin Euro 2020-a Italy an champion tum pawh khan squad-ah a tel ve nghe nghe. 

Tun nipui bazar chhung hian West Ham hi an inla thar nasa hle a, Emerson hi player pasarihna tur niin player lak luh nan pound maktaduai 120 an seng tawh a ni. Emerson hian Chelsea lamah kum hnih daih contract a la nei a, season hmasa khan Lyon lamah loan-in a khel a, Ligue 1-ah game 29 khel a khel a ni.

Emerson chuan,"He hmuna ka awm thei hi ka hlim takzet a ni. Ka tan chuan chona thar lian tak a ni dawn a, team lian tak a ka tel thei hi ka lawma tunah chuan ka inpeih tawh a ni," tiin club thar a zawm chu nuam a tih a rin thu a sawi. West Ham-ah hian jersey number 33 a ha ang.