David L.Ralte Six String Cabin Durtlang North Tun tumah hian he thawnthu atanga thil tha lam tur lo inphum ru reng haichhuah i’n tum leh dawn teh ang. Chemtatrawta hming hi Chemtatrawta a ni lo! Chemtatrawta thawnthu intan dan atang hian amah hi patling thankin tawh, nupui fanau hrawkchawm leh pa rorum tawk tak a nih ngei a rinawm. A nu leh pate’n a pian hlimah a hming tur hi an phuahsak ngei ang. A thawnthu phuahtu hian, ‘Hmanlai hian Chemtatrawta hian luiah chem a tat rawt rawt a’ a tih hi, “Hmanlai hian pa pakhat hian luiah chem atat rawt rawta, chem a tah rawt rawt avangin a hmingah Chemtatrawta an phuah ta a,” a tihna a ni ngei ang. A thawnthua a changtupa hming put chhan hi a ropuiin a entawntlak ngawt mai. A hming pangngai thlak hlawk tur khawpin a hna thawh laiah a tuiin a inpe a ni. A thiltihlai lo hmutute tan chuan Chemtatrawta tih hming aia hming dang phuah tur a awm chuang lo. Chemtatrawta pawh hi chu mi avang chauh va Chemtatrawta hming hi lo pu ta a ni. Khawvelah hian a thawkrim, remhria leh tih tak zeta thil ti thin tan kan Pathian hian hlawhtlinna a dah. Malsawmna hi a vantla chhar tur a vang hle. Mizo zingah pawh eng kawngah pawh nise, kan mi hlawhtling leh mi ropuite pawh hi han belchiang ila, hlawhtling tura an beihna kawngah chuan, “Chemtatrawta” hming puttir tlak thah an ni deuh vek mai. Mi hlawhtling ni tur chuan, ‘kalkhat’ kan tih thin ang deuhte hi nih a ngaihna chen a awm. Kan ram hruaitute, kan sakhaw rawngbawltute hi an thiltihah takzeta an tih thin avanga an hnathawh a, ‘Chemtatrawta’ hmingpu tlak hi kan hmu tam lo viau a nih chuan ram ropui thlen a har khawp ang. West Bengal Chief Minister hlui, Jyoti Basu kha an ram mipui tan chuan Chemtatrawta a ni. Tripura CM Manik Sakar khu Tripura mi leh tam zawk tan chuan an Chemtatrawta a ni. Anmahni leh chhungkhat laina inhaivur ai chuan an rawngbawlsak mipui tan an rethei ngam a. Ram leh hnam hmasawn nan tih takzetin chem an tat thin. A chem a va hriam tha em! Chemtatrawta hian a chem hi a tat uluk bawk a, a va han hriam tha tehreng em! A nun khawchhuah nan leh a nupui fanaute chawm nana thil pawimawh hmasa ber a hria, chu chu eng dang vak mah ni lovin, hriam taka chem tah a ni tih a chiang a, a chian ang ngeiin a tat hriam na rawh e. Kaikuangin a rawn cheh khan thil dang ti hmasa set set lovin a chem hriam leh hriam loh enchhin nan a bula mau chu an sat chhin a, a kit pawh a ni lo, a fikin a ni a fik ni. Democracy rama political party kan neihte hian Zoram hmasawnna leh changkanna tak tak tur hian an chem hi a hriam tawk lo fo. Mipuite min zawrh an policy leh manifesto-te hi a hriam tha ai mahin mipuite ban phak tawk leh vote hmuhna tawk vel, ram leh hnam changkanna atan erawh hman tlak hauh loh an nih fo chuan kan ram hian chankan tik ni a nei lo vang. Mipui tam tak ngaihzawn ringawt hi ram hmasawn nan a tlak loh fo. Middle East ram khu tun hma chuan ram rethei, thlai engmah that theih lohna hmun khawro leh thlaler ram mai a ni. A ram mipuite mamawh khawp engmah an thar thei lo. Mahse, hun eng emaw lai khan mi thiam pakhat chuan an rama thlai a that theih loh chhan hmuchhuakin an ram lei hnuai dapa oil a awm avangin, oil hu chuan thlai a titha thei lo tih a hre chhuak ta a. Ram dang atangin oil hai chhuak thei an chaw lut a, tunah chuan khawvela ram hausa ber-te zingah an lo chuangkai ta. Kan sakhaw rawngbawltute chem pawh hi tah mang hleih loh, tute emaw hman bilhnu hmang hian an Beramte hi kham khawp min tharpui an han tum sa teh thin a. Lo vat tur chuan chem hriam a ngaih tlat avangin kan thlarau a tuihal a. Kristiante’na kan hmun thianghlim ber leh Thlarau Thianghlim chenna hmunpui, Biak Inah kan chaw kham khawp kan hmu ta lo. Kelkangah kan kal, a mak leh ingeuh thlarau apiang kan bawh hum hum lo thei lo. Hei mai a la ni nem, zirtirtute pawh hi sawrkar hian world class education policy han hlui teh hi tum thin mah se, an chem hi tah hriam ver vawr an tum peih tawh lo. Anmahni thawhna ngei school-a an fate luhtir ai chuan chem hriam nei school chu fees tam tak chawiin an luhtir ve mai a, mipui pawhin anni berin an tih chuan neih thinglung khawngin chem hriam nei school nge ngea ngaiin kan bawh ruih ruih mai a nih hi! Tunlai khawvel changkannain a kentel mila thiamna pe tur khawpin an chem an tat hriam peih ta lo, a pawi a ni. Zirtirtute hi hman deuh kha chuan mahni service matter thil pawh ngaihven nachang hre lo, ngaihtuah ngai lo an ni thin. Tunah erawh chuan department danga mite nen an danglam ta chuang hauh lo. An hming bulah Ztu (zirtirtu lamtawi) tih an dah kalh mai laite khan tu fa mah hian kha pa kha an namnul thiang lo, a zahawm a ni. Hawh u, chem hi Chemtatrawta ang hian tat hriam teh u khai! Thil tisualtu ngeiin a tuar/a vawtuin ek a cheh: He thawnthua a kaikuang ber chu Kaikuang a ni! Tun thlenga thil eng emawa mawhphurtu sawi nan ‘a kaikuang’ kan la tih tak zel hi. Kaikuang khan a thil cheh tur kha chep ta se, a pawi ang em, thil tha lo thlen thei a ni em etc. a hre kherin a rinawm loh, chuti chung chuan a thil tihsualah mawh a phur vek a, a tawpa tuar nasa ber pawh amah a ni. Kan ramah hian ram tana thil tha lo leh pawikhawihna tam tak a thleng tawh, a thleng mek, a la thleng zel dawn ni pawhin a lang. A kaikuang ni lo hi a tuartu a nih chang a tam mai. Kan ram hruaituteah leh kan officer tam takte pawh hi an mahni thil tih sual ni miah loah an hmingchhe hrep thei ve tho mai. ‘Dan hriat loh hi chhuanlam a tling lo’ an lo tih thin hi he thawnthu hian min lo hrilh daih tawh. Chuvangin, mi zawng zawng hi Law College-ah dan zir turin kan lut thei vek hauh lo. Mahse, kan ni tin nuna pawimawh zualpui hi chu kan inzir chawp ve thei vek tawh. Dan hriat loh avanga thil kan tihsual a awm thei; mahse, rorelna hmaah chhuanlam tling a ni si lo. Kaikuang thiltih avang khan khati khawp khan an buai ta kha a nia, a titu an in zawng a, a tawpah kaikuang ngei a ni tih an hria a. Kaikuang hi hetah tak hian a ropuizia leh a thiltih dik lovah mawh a lak ngamzia lo lang ta chu! Sawi duh se chu thiamthu sawi tur a nei teuh, hremna pawh a pumpelh ngei ang. A ka chu a ang; mahse, thiam thu a sawi lo! Kaikuang dam reng rawh se! Kan sawi tak ang khan keini Pathian ringtute hi chu kan thil tihsual ngei ngei leh dik lo leh sual a ni tih kan hriat reng pawh insawi fihlim kan tum satliah mai pawh ni lovin, mi dangte kan la mawhpuh thin hi zawng, a kaikuang zia lo em mai. Kristian kan nih hma daih atang tawhin kan pi pute hian Kristian kan nih hnua kan nun dan mawi tam tak hi an lo ching daih tawh. Lem chang kawi mai mai lovin Chemtatrawta thawnthuah pawh thil tisualtu chuan pachang takin a sual man phu tawk hrem chu a tuar mai. Puh mawh tur a zawng lo. Hawh u, kaikuang atang hian Mizo kristian nun dik tak hi i chhar thar leh theuh ang u.