ZALEN August 18, 2026: Khawzawl District Drug Disposal Committee bultumin vawiin khan Krishi Vigyan Kendra (KVK), Khawzawl-ah Drugs halralna hun hman a ni a. Khawzawl District Superintendent of Police F. Lalbiakzauva leh Sub-Headquarters YMA President Rosiama ten he hun hi an hmanpui a, Addl. Superintendent of Police Zosangliana’n hun a kaihruai. 

Drugs hal ral te hi April 2026 leh June 2026 inkar chhunga man niin, Methamphetamine kg 1.972, Rs. 1,57,76,000/- man hu leh Heroin (No 4) kg 1.283, Rs 2,56,00,000/- man hu te a ni a, avaiin Rs 4,13,76,000/- (Nuai 413.76) man hu a ni. Heng ruihhlo man kaihhnawihah hian Khawzawl Police Station-ah case 15 ziahluh niin mi 17 man an ni.  

He programme-ah hian drugs man kawnga Khawzawl District Police thawhpuite leh witness-a tang mi 21 hnenah lawmman hlan a ni.

Kumin 2026 January atanga August thla thleng hian Narcotics, Drugs & Psychotropic Substances Act (ND&PS) hnuaiah thubuai 26 ziahluh a ni tawh a, Methamphetamine kg 20.568, Rs 16,45,44,000/- man hu leh Heroin (No 4) gram 936.7, Rs 2,08,00,000/- man hu te man a ni a, Case kaihhnawih ah hian mi 39 man an ni a, an zingah hian kum tlinglo 2 an tel. Kumin 2026 a Ruihhlo man zawng zawng hi avaiin Rs 18,53,44,000/- (Nuai 1853.44) man hu a ni. 

2025 khan Khawzawl PS ah ND&PS case 12 ziahluh niin, Methamphetamine hi kg 11.612, Rs 15,095,600/- man hu te, Heroin gram 747, Rs 84,80,000/- man hu leh Ganja Kg 5.879, Rs 29,395/- man hu te man a ni a, heng case kaihhnawih ah hian mi 15 man an ni. Kum 2025 chhunga ND & PS case hnuaia ruihhlo man zawng zawng hi avaiin Rs. 2,36,04,995/- (Nuai 236.05) man hu a ni.

April ni 2, 2026 khan a hma lama ruihhlo mante chu Drug Disposal Committee ruahmannain hal ral a lo ni tawh bawk a ni.