Covid -19 thawh hnihna chuan Mizoram nuai mekin community transmission in min  luhchilh thawkhat tawh tih a lang a. Tun tum chu sawrkar pawh sumah a mangang ta hlein a lang a,  CM relief fund ah pawh pawl, mimal leh Kohhran angin puihna sum chhunluh mek niin  sawrkar hnathawk te atanga puih dil hialin sawrkar hna -thawk pawl  inhmukhawm chuan a ruaitu sawrkar chu ni khat hlawh pein an pui dawn a, hetih lai hian sawrkar chu inrenchem ve turin an duh thung a ni.

Tun tum hripui vawi hnihna lo thawk tur hi thui tak a ven lawk theih niin a lang a. Hri lo luhna ber state thenkhat  te chuan April chu sawi loh February leh March atang tawh khan a let engngemaw zahin covid case pung an nei tawh a.  Mizoram sawrkarin March ni 23 leh April ni 9-a a thuchhuahah erawh zin hawte lakhran vek lam a la rawn dim hle a. Serchhip inthlan a zo a 20 April ah inkhuahkhirhna a puang ta chauh a ni kha. April thla tir khan tuna kan tih mek ang hian zin hawte hi lakhran niin khung hrana a hnua RT-PCR a test  ni zel sela tuna community transmission kan neih pawh hi a zia theiin a rin theih a ni.  Sawrkar hi a thutlukna siamah a tlai a tih loh theih loh a, khauh taka hmalak lo ni tawh se hripui vanga sum senso leh tur a tlem zawk ang em? tih thlengin rilruah a awm a ni  ni. Eng pawh nise tihsual chu awm thei a ni a, tun dinhmunah hian engtin nge kan kal zel dawn tih lam hi insawrbingna ni zawk sela.

Sawrkar hnathawk pawl inrawnkhawm te’n an sawi te hi thil awm lo a ni miah loa, SEDP board 14 enkawl hautak ziate, PAHOSS a sum tam tak pek chhuah te, sum harsat laia contract hna inpek rengte, sum inrenchem  dan a rualkhai lo nia ngaihna hi mi tam tak ngaihdan a ni mek a.  Political party dang te pawhin SEDP board enkawl nana Nuai 2600 chuang senral tul an tih loh thute, tul lutuk lo hnathawh titawp tura an duh thu te an lo sawi tawh a ni.

Covid 19 hrileng hi rei tak kan la hmachhawn dawn tih a hriat tawh a, a sulhnu neih thlengin mi tam tak nun a nghawng dawn a ni. Rawtna leh ngaihdan te hi sawrkar hian uluk taka ngaihtuahin a theih chin chinah rual khai zawka inrenchem lehzual lam hi a hawi a tul tawh tak zet a.  Hna inpek chungchangah party worker te pawh insumkar hriha thiltitheite nawr zawngin che lo sela a duhawm khawp ang. Rual khaia inremchen hi rei tak chu kan thupui a nih a ngai dawn a ni.

Tun ang hunah chuan sawrkarin tihsual palh a lo neih te pawh hriatthiam saka tanrual a hun tawh a.  Puih ngai a ni tih sawrkarin a sawi hi a kawi zawnga laloin ‘theihtawp chhuah tlan a ngai a nih hi’ tih rilru pua kan neih leh ngaihtuahnate kan vawm khawm a hun a ni.