ZALEN December 9, 2024 : Chhandamna Kohhran (Salvation Church of India) Inkhawmpui lian National General Assembly vawi 16-na chu ni December 7&8, 2024 khan Dinthar Kohhran-ah neih a ni a, kohhran report atanga a lan danin kum kalta chhung khan ringthar 54 an neih belh.

SCI General Secretary Upa Lalawmpuia Khiangte-in report a pek danin Chhandamna Kohhranin ramthar rawngbawlna Assam, Tripura, Odisha leh Andhra Pradesh-a an kalpui mekah kum 2024 chhung hian ringthar 54 an punbelh a. Mundiguda, Odisha-ah Biak in tur ram an lei thar leh bawk a ni. Chhandamna Kohhran hian Mizoram chhung leh pawnah rawngbawlna an kalpui mek a ni.

SCI hian Ni 7.12.2024, Inrinni khan rorel inkhawm neih niin Kohhran rawngbawlna kaihhnawih rel tura chhawpchhuah chi hrang hrang 16-te chu relin hun hman a ni a. Kum 2025 chhung atana Kohhran Budget tur rawtna chu pawm a ni bawk.

Aizawl Area leh Kolasib Area-te chu area pahnihah ve ve then a ni a. Bial khat ni thin chu bial hnih ve ve an ni tawh ang.

Inrinni zan atanga Pathianni zan thleng khan Kohhran mipui pual inkhawm hlawhtling takin neih a ni a. Ni 8.12.2024, Pathianni chawhma khan Pastor pakhat, damchhung upa pali leh Senior upa pathumte chu Rev. Dr. R. Lalsangzuala, SAO chuan a nemnghet a ni. Pathianni chawhnu inkhawmah Rev. C. Rualchungnunga, Aizawl Area Pastor chuan Lalpa zanriah a buatsaih bawk a ni.

Inkhawm hrang hrangah hian Pastor Lalsangmawia, Upa Dr. H. Lianzela, President, SCI leh Upa Ch. Lalnunchama, Treasurer, SCI ten Pathian thuchah an sawi a. Inkhawm hrang hrangah hian Pathian fakna hla, Malzai leh Zaipawlte ngaihthlak a ni bawk.

Chhandamna Kohhran, kum 2025 inkhawmpui chu Aizawl North Area-in an thleng dawn a ni.