Aizawl October 3, 2024 : October ni 2, 2014-a din Chhandamna Kohhran (Salvation Church of India) chuan an Kohhran kum 10 tlin lawmna leh Pathian hnena lawmthu sawina inkhawm neiin October 2, 2024 khan LPS Arena, Falkland-ah hun an hmang a, nizan khan a tiak.

Kum 10 tlin lawmna atan hian Jubilee mei det a ni a. Kohhran hruaitu hmasa ten Jubillee dar an vaw bawk.

Kum 10 tlin hriatrengna lungphun chu Chhandamna Kohhran President, Upa Dr. H. Lianzela'n a hawng a. A lawmna inkhawmah hian Kohhran mipui bakah kohhran pawl dang atangin telpuitu an thahnem hle a ni.

Lawmthu sawi inkhawm hi Upa Laltlanthanga, Vice President in a kaihruai a. Upa Lalawmpuia Khiangte, General Secretary hnen atangin report ngaihthlak a ni.

Kum 10 chhunga Kohhran tana kawng hrang hranga mithawhhlawkte hnenah chawimawina hlan an ni a. Kohhran mipuiten rawngbawltu pastor-te leh missionary-te bakah an duhsak zawngte hnenah thilpek an pe bawk a ni.

Upa Dr. H Lianzela, President chuan Presidential address sawiin Ringtute hi Kristaah pumkhat kan nih a ngai a. Krista pakhat, Bible pakhat leh Rinna pakhat kan neih a hun a. Ringlomiten min beihna laka kan him theihna turin Kohhran zawng zawngte inpumkhat a hun a nia ti.

One in Christ, TBZ Choir leh Fundamental Baptist Church, Mizoram Zaipawl ten fakna an hlan a. Kohhran chhung atangin Mass choir bakah Zaipawl hrang hrang zai ngaihthlak a ni a. Mal zaiah Rinhlui Tlumang leh Sawmtea Chhangte te an zai bawk.

Inkhawm hi 1.10.2024 zan atanga ni 2.10.2024 zan thleng buatsaih a ni a. Inkhawm hrang hrangah te hian lawmna item chi hrang hrang neiin Pastor leh Kohhran puipa thenkhat hnen atangin Pathian thu ngaihthlak a ni thin a.

Kohhran kum 10 tlin lawmnaah hian Synod, FBCM, Rinna Kohhran, LIKBK, EFCI leh a dangte atangin lawmpuitu an tel a. Thilpek hlu tak tak an hlan hlawm a ni.

Ni 2.10.2024 tlai khan kum 10 tlin lawmna ruai theh a ni bawk a ni.

Chhandamna Kohhran hian Chaltlang Lily Vengah Kohhran National Headquarters neiin Mizoram chhungah kohhran 21 an nei mek a. Ramthar lamah Andhra Pradesh, Odish, Assam leh Tripura-ah te rawngbawlna an kalpui mek a ni.