Aizawl March 31, 2023 : Vantawng Group YMA Inkhawmpui Vantlang Inkhawm hmanpuitu J Malsawmzuala Vanchhawng, Mizoram State Commission for Child Rights Member chuan naupangte enkawl kawngah tanlak nasat a tul thu a sawi a, chhe lailet der anga Mizoram chhuah chu a dik lo tiin, mi tha tam tak an la awm thu a sawi.

J Malsawmzuala Vanchhawng chuan, "Chhungkuaa seilen chu naupang zawng zawngte chanvo bulthum a ni a ti a, Naupang tanpui ngaite enkawlna hmun, CCI/Home-ah te dahluh ngai an awm lohna turin, nu leh pa, pi leh pu, leh an laina hnaiten Zo nun ze mawiin a ken tel, naupangte enkawl puitlin kawnga kan mawhphurhna kan hriat thar leh theuh a tul a ni," a ti.  

Mizoram chuangchang sawiin J Malsawmzuala chuan, "Mi thenkhatin Mizoram hi chhe ta em em, thalaite pawh laktlak loh leh ruihhlo vanga buai tam em em angin an sawi fo a, a tak takah chuan thian chhan thih ngam thalai rual sang tam tak, khawtlang tana mi tangkai, khawtin leh veng tinah an la tam em em zawk a ni. A chhe lai ringawt kan inhrilh tam lutuk chuan 'tumah ring zo lo, Politician tumah ring lo, khawtlang hruaitute pawh ring zo lo, Dan kengkawhtu police te pawh ring chuang lo, mipuite rawngbawl hna thawktu sawrkar hnathawkte pawh ring chuang lo, Dan rorelna pawh ring chuang lo kan insiam belh zel thei a, chu chuan 'Zo nun zemawi' bakah mipui rorelna, democracy lungphum a ti nghing nasa hle thei a ni," a ti.

J Sawma chuan pawl ropui tak, YMA leh tlawmngai pawl dangte bakah Kohhran hote venpuina hnuaiah, tunhma nena khaikhinin Mizoramin hma a sawn nasa hle tiin, "UN Assembly ruahmanna bawhzuia Niti Aayog in tehna hrang hrang a duan chhuahah pawh Mizoram chu India ram state te zinga hmahruaitu 12 zingah a tel phak a, Economic Survey in a tarlan thil tam tak atang pawhin Mizoram hmasawn chak zia a hmuh theih a ni," a ti.

YMA member te chu engtiklai pawha beiseina nung nei tura chahin, lungrualna tha tak nen, ram leh hnam tana an tih theihte hlen theuh tum turin a chah a, an khawih phak chin theuh leh an thunun phak chin zel theuhah, a tha zawnga damlamna thlentu an nih theuh chuan, chumi infinkhawm chuan  Mizoram chu hmasawnna lamtluangah chak leh zualin a kaltir ngei ngei dawn a ni a ti.

Vantawng group YMA Inkhawmpui ah hian an huamchhunga YMA Branch 13 ten Mizo Lengkhawm zai leh Mizo Hnam lam hmangin intihsiakna an nei a ni.