Aizawl April 8, 2023 : Vawiin khan Minister Lalruatkima, Aizawl West II MLA ni bawk chuan a bial chhung Dawrpui Vengthar-ah mithar lawmluhna hun a hmang a, "Sawiselna leh demna karah leh chhe lailet dera puhna karah pawh Pathianin min hruai zel a ni," a ti. 

Mithar lawmluhna inkhawm hi Vanlalzawni In Dawrpui Vengtharah hman a ni a. Lalruatkima chuan thu sawiin, "MNF chu Mizo nationalism kengtu kan ni a, kan hnam, kan ram leh kan sakhua a him zelna tura thawktu kan ni. Kan innghahna thupui chu Pathian leh kan ram tan, tih a ni a. A chhe thei ang bera thudik ziak tluak lo leh dawt hmangtein beih kan tawk thin a. Sawiselna leh deuna karah pawh kan Pathian chu kan vuan tlat a, chhe lailet dera puhna karah pawh Pathianin min hruai zel a ni," a ti.

West II bialtu Ruatkima chuan, "ZPM leh Congress-ah hian kan thawh aia thawk tha thei an awm chuang lo tih hi a chiang hle. Congress chu kan hre tawh a, ZPM pawh kan hriatsa te kha an ni nual hlawm. Tuna an MLA leh AMC Councillor-te pawh hi han en ila MNF nen an danglamna teh chiam a awm lo. Pu Zoramthanga hnuaiah hian Zoramin hma a sawn nasa em em a, chu chu kan hmu mek a, kan hmu zel dawn bawk a ni," a ti bawk.

MNF thuchhuak chuan Dawrpui Vengthar-ah hian mithar,  chhungkaw 8 atangin voter 24 MNF-ah an lawmlut niin an tarlang.