-Lallunghnema Charity Lodge Ph- 9402321590 Zoram tana mi thahnemngai thenkhatten chhiah pe lo, chhiah awl ru tam tham tak RTI Act hmangin an hai chhuak a. Chanchinbu leh Social Media hrang hrangah tar lan a ni a. Heng sumdawngho chhiah bat leh pek loh hi cheng vaibelchhe tam tak a lo ni a. Keini ang ram intodelh lo tan hi chuan a uiawm tak zet a ni. Sumdawng chhiah awl ru ho zingah hian ram hruaitu an awm nual bawk. Chhiah an bat hi cheng vaibelchhe eng emaw zat a tling a ni. Chutiangin chhiah awl ruho zingah Zoram hmangiahtu inti an lo inphum ru teuh mai a. Hei hian ram mipui beng a tithlep nasa em em a ni. Heti tak mai a kan mi hausa ten ram chhiah an awl ru ta mai hian ram neitu kan nihna zawn atanga thlir hian rilru a na hle a ni. Chhiah hi ram mipui sum a ni a, chhiah hi heng sumdawngho hian an lo eiru a ni a tih theih. Hrem lohva chhuah ngawt chi a ni lo. Ram dangah chuan chhiah awl ruk hi dan bawh chhiatna a ni a, chung chhiah awl rute chu lungin hial an tang thin tih kan hria. Engvangin nge Mizorama chhiah awl ruho hi hrem an nih loh bik ang le? Mi rethei tetein chhiah tlem tete an bat kan en liam mai thei lo, pawisa tlem tete an bat pawhin chak takin kan um zui a, cheng singhnih khat lek an bat pawhin ‘ar chuk tui lo’ khawpin kan inchhuah leh si. Hetih lai a sumdawng hausahoin ram hmangaihna chhete pawh nei lova chhiah an lo pumpelh ngam hi a huat thlala tak zet a ni lawm ni? Zoram hmangaih ber ni awm zia zangin kan insawi hlawm. Mahse mahni pumpui tan chauh kan lo hmangaih a ni maw..! Chhiah pe tha duhlo ho zing ah ram hruaitu hming kan hmu fur mai te hi apawi hle a ni! Sumdawng hausa thenkhat chhiah awl ru ho phei chu ram vei inti an ni. Anniho chungah hian rinna kan nghat ngam ang em? Hetiang zo zai chhiah awl ru ten tun chunga Zoram hmangaihtu ber ber awm anga in sawi hi sualna chi khat, hlemhletna chi khat a ni thei angem? Hlemhletna a ni mai lova; ram phatsanna chi khat a tling hial a ni, Sorkar hian an chungah hremna a lek tur a ni dawn lawm ni? India rama State rethei ber niin zak miah lovin kan iak kan iak a. Hmasawnna tur kan la ngah, thar chhuah kan nei lo, kan neih chhun lahin belh chian a dawl bawk si lo. Kan tui thianghlim bottle a thun ve te lah chu Food Safety-ho lah chuan a ‘thianghlim tawk lo’ an ti leh bawk si. Kha chen kha puipun nikhuaah kan lo intulh ve khang lang a, kan thihpui hlawm lo kha vanneihna chi khat a ni reng mai. Hetiang thil lo pawh eng emaw zat Mizoramah siam chhuah a ni. Mahse belhchiandawl fek fawk sawi tur a la awm mang lo. Thil tha leh tlo, tlawm chu State pawn atanga kan chawk luh a ni deuh zel. Nghapih hi a tui ti kan tam, Burma atanga chawk luh a ni. Dngpuithu pawh Tlabung lam chhuak a ni. Kan thar chhuah ve chu Tuibur a ni, Tuibur Factory a lar hle. Mizorama Industry tha ber ni a an sawi thin chu Sorkar hna a ni. Sorkar hna thar siamna Factory din lah a remchang tawh si lo a nih hi. Inelna leh intlansiakna kawng kan zawh mek chu Motor tha neih leh In changkang neih a ni. Mobile phone changkang neih intihsiaknate hi a lar ber pawl zu nia mawle! Eiruk intihsiakna a lawmman pakhatna lak erawh i tum lul lo ang u. A tawp ber atan chuan, chhiah awl ruk hi Sorkar leh mipui pawi khawihna a ni tih tute mahin kan hai lo, Sorkar hian arang, arangin um zui hlawm teh se, kan ral thum hma hian.