Covid-19 hri leng avangin mi tin kan buai a ni ber a, sawrkar lam pawh hna thawk hlei thei lo khawpin an khawsa a ni ber a, chutihlaiin Taxation department lam chuan sawrkar kum kal mekah an target khumin sawrkarah sum tam tak an chhunglut a ni.

Taxation department hian he dinhmun thleng tur hian nasa takin an thawk tih a lang reng mai a, an hnena chhiah pe tur te kar mai piah lamah a puih theihna laia pawh an pui nasa hle tih an sawi a, hei hian nghawng tha tak a chhuah ta reng a ni.

Taxation department lam hian eng ang chiahin nge an target khum tur hian hma an lak chu hriat ni lo mahse, Mizote hian chhiah hi pek kan hreh lo tih a lang a, hetiang hun harsa kara pawh an target an khum theih chhan hi tax petute an pek that vang a ni a, kan tih tur chinah chuan kan tlanchhe lo tih a lang awm e.

Sawrkara chhiah chhun ngai hi chi hrang hrang kan awm a, kan chhun lut dan erawh a inanglo hret hret a, Transport department lamah fee leh road tax kan pe a, Tui leh Electric bill kan pe bawk a, dan kalha kan chetin Police leh Excise lamah kan fine thung. 

Transport lam hi an sum hmuh tur ang hmu tha lo ber zinga mi a nih ngei a rinawm a, chutihrualin an department hian lirthei neitute hi pawisa an thing ngai lo a ni ber a, Traffic nen tangkawpa No Tolorence Week an hman thin avangin engemaw chen hi a hmu letling zawk a tih theih.

Tun hnaiah Electric bill kalphung a danglam hret avangin kan buai laih a, kha pawh kha a awmzia tak chu bill dan kalphung dik tawk loh vang a ni.

Sawrkara sum lut tur hi thui taka ngaihtuah chuan kan inthin dan kalphung hi zirchian a ngai khawp mai. Taxation department ten an hnena chhiah pe tur te an nawr thin ang leh a tul anga an pui thin ang deuh hian department hrang hrang hian ruahmanna tha hi siam se hei ai hian chhiah hi a luh that ngei a rinawm tlat a ni.