Mizoram hi ruahtui tamna rama awm kan nih mai bakah mithiamte chuan lirnghing nat theihna ber hmuna awm kan ni tih an sawi a. Hei mai bakah Bay of Bengal hnaiha awm kan ni bawk a, chumi awmzia chu thlipui na chi 'cyclone' thlen mai theihna hmunah kan awm tihna a ni.

Khuarel chhiatna chi hrang hrang tuilian, leimin, lirnghing leh thlipui zingah hian Mizoramin kan tawrhna nasat ber leh kan khawpui Aizawl tibuaitu ber chu leimin hi a ni awm e. Khuarel chhiatna dang lirnghing na pawh kan la tawng lem lo a, lirnghing vanga chhiatna liantham thleng, thihna hial a thlen awm kan la hre lo a. Thlipui pawh tuar thin bawk mah ila hmundang ngaihtuah chuan a nep tham hle a tih theih a. Tuilian pawh Tlabung leh a chhehvela tuilian kan tawrh bak chu Tlawng lui lian vanga harsatna thleng te a ni deuh mai a, kan vannei hle a tih theih awm e.

Mizoramin khuarel chhiatna kan tawh tam ber leh min tibuaitu ber chu leimin hi a ni. Kan hriat angin Mizoram chu tlangram a ni a, hei mai bakah ruahtui tlak tamna hmun a ni. Mizoram leilung hi a la upa tawk lo nia an sawi avang leh ruahtui a tlak nasat avang hian leimin pawh a tam hle reng a, leilungin a zirloh chu thuhran nise kan khawpui ber Aizawl a leimin a awm tamna chhan ber chu mihring siamchawp hi a ni. Kumin bikah hian kumdang aiin ruahtui a tla tlem a, ruah a sur pawhin tum khatah tam tak a sur loh avangin kumdang aiin leimin hi kan tawk tlem niin a lang.

Chuvangin kan fimkhur chuan tuna khuarel chhiatna kan tawh thin hi a pumpelh theih a ni tih chiang takin a lang. A bikin Aizawl khawpui ah chuan kan inhmun laih dan te, kan tuichhe paihdan mumal lo lutuk te hian chhiatna min thlen tih chiang takin a lang. Chuvangin in kan sa dawn emaw kawng laih leh leilung kan khawih danglam dawnin mithiam te rawn thin ila, mithiam ten a him an tih ang chauhin hma la ila chuan tuna kan siamchawp chhiatna thleng hi kan pumpelh ngei a rinawm e.