Aizawl: Nizan hmasaa ruah bawhawk sur vang in hmun hrang hrangah leimin a tam hle a, in engemaw zat luah ngamlohin a awm bawk. Venghlui-Republic road a Governor compound chu nizan hmasa ruahsur vang hian a min a, kawngkama car pakhat Rahim c/o Prof. Vanlalchhawna ta chu a delh chhia a, kawngko min hian hun engemaw chen lirthei kalvel pawh a tibuai a. Nimin tukthuan eikham khan Local Council ten hnatlang kovin PWD te nen tangrualin lirthei te chi kal theihin an titlang leh Bawngkawn Chhimveng ah chuan in 3 chu a chim mai a hlauhawm avangin nimin khan khawtlang chuan hnatlangin an thiat a, hnatlang ah hian mi 300 chuang an thawkchhuak a ni. Khatla thlanmual chu nizan hmasa ruahsur vang khan nasa takin a min a, thlan engemaw zat a min chhia a, nimin khan khawtlang in ruang leh thlan senghawi hna an thawk. Ruahsur nasa hian NH 54 Zemabawk Champhai Road (Rochila Saiawi In bul) chu nasa takin a min a,hun engemaw chen lirthei kaltlang theih a nihloh hnuin nimin chhun khan lirthei kaltlang theiha tihtlang leh a ni. Ramhlun ah lung lumin Lalhmangaiha Ramhlun Sports Complex te in chung deng pawp in an Fridge te a deng chhia a, lungin a den na lai hi choka lam anih vangin mihring hliam an awmlo.