Aizawl: Mizoram chhimlam district pathum Lunglei, Lawngtlai leh Saiha district-ah te Iodine tlakchham avangin district dang aiin harsatna an tawk nasa bik a, hemi tihreh nan Health department chuan tan an la mek. Health Department thawktute hnen atanga Zalen thudawn danin Iodine tlakchham avang hian nauchhiat, nau thisaa piang, rualbanlo, awrpuar, nau sawngnawi, lehkha thiam thei lo leh harsatna eng emaw zat a thleng thei a. Hei hi tihreh a nih theih nan Iodine chi chauh ei turin mipuite zirtir an ni a, Iodine chi chauh mipui ten an ei hnuah harsatna pawh a ziaawm niin an sawi. Health department thawktute chuan mipui hnenah Iodine chi chauh ei a pawimawh thu an zirtir bakah a theih ang angin dawrkai te chu Iodine chi an zawrh leh zawrh loh an endik thin tih an sawi bawk. Health department hian sikul naupang kum 6 atanga 12 inkar ah test an nei thin a, hemi inkar hian mipui awmdan a hril (population represent) nia an hriat vang a ni a. Kumin atan Aizawl district chu survey zawh tawh a ni a, Lunglei, Saiha, Lawngtlai leh Champhai district-ah te survey hi neih leh mek a ni a. Mizoram district zawng zawng survey an neih loh chhan chu sum lam harsatna vang a nih thu Health department thawktute chuan Zalen an hrilh. Health Department survey atanga a lan danin Iodine tlakchham vanga harsatna tawk hi kum 2012-13 ah 6.8%, 2013-14 ah 8.24% leh 2014-15 ah 6.92% an awm a. India ram pum ngaihtuahin a vantlang velah Mizoram chu a awm mek a ni.