ZALEN June 16, 2026 : Tun hnaia Chhinga Veng leh Dawrpui inkara ramri chungchanga inhriatthiamlohna thleng chungchangah Chhinga Veng Thalai Pawl (CVTP) chuan vawiin khan thuchhuah an siam a, hma an lak chhan te an tarlang a, an veng humhim tur hian hma an la zel dawn an ti.

CVTP chuan, "Tun hmain ramri buai kan neih kan hre ngai lo a, Electric Veng Sakawrpului atanga Bazar pan chhohna atanga ABC lane hi pi leh pu atanga Chhinga Veng chhung a ni a, kum 2020-2021 Covid len lai khan helai area ah hian Dawrpui lamin dawr in khar tura hriattirna lehkha an rawn sem a, Chhinga Vengin an veng chhung a nih avangin dawr in hawng turin an hrilh ve leh a ni."

Chhinga Veng Local Council leh NGOs te chuan Kum 2025 kum tawp lam khan Chhinga Veng chhunga dan phalloh a sumdawngte titawp turin hma an la a, vai sumdawng tam tak pawh tih tawp tir an ni a, March 2026 khan Dawrpui Local Council chuan ABC lane a awmte chu Dawrpui Veng hming lanna Sign board tar turin an hriattir tawh bawk tih an thuchhuah-ah hian tarlang a ni.

YMA Day ni 15.6.2026 zing khan Dawrpui hnatlang chuan Chhinga Veng chhungah an rawn hnatlang a, tawngkamin Chhinga Veng KTP leh YMA building te chu ‘Dawrpui Venga awm in ni e’ tiin an sawi a. He thil hi hrethiam lovin Chhinga veng thalaite chuan an che chhuak ta a ni an ti.

Chhinga Veng hi Aizawl a veng hlun tak zinga mi a ni a, 1912 ah Pi Phiri m/o Rev. R. Lalengkima te pawh awm tawhin 1932 ah phei chuan in 25 a ding tawh a, Dawrpui Veng atanga indang ni lovin, Kohhran erawh chu Dawrpui Kohhran atanga indang a ni. Chuvangin an veng humhim tur hian Chhinga Veng Thalai Pawl chuan hma an la zel dawn a ni, an ti.

Chhinga Veng Thalai hnatlang thenkhatin tukina an Veng chhunga Armed Veng Kohhran Thalai hoarding tar an lo la thla palh chu pawi an ti a, an mi ngaihdamna an dil a, hoarding te hi thalai ten an tar tha leh vek tawh bawk a ni, an ti.