Aizawl; Mizo Students Union huaihawtin November ni 5-7,2014 inkar chhung khian Hakha stadium, Myanmar ah Chhinlung Cultural Festival neih a ni dawn a, inkhawmpui thupui atan hian 'Ram hian ri a nei a, hnam hian ri a nei lo' tih hman a ni ang. MSU President Zodinpuia chuan festival ah hian India, Myanmar leh Bangladesh a Zo hnahthlak hnam hrang hrang atangin palai 1200 vel an tel an beisei tih a sawi a. "British sawrkarin Mizote a thendarh avangin unau tih inhre lo ang maiin kan awm a, unau inkarah pawh inhriatthiamlohna a thleng thin a. Chhinlung chhuak Zofa, ram hrang hrang sawrkar awpbehna hnuaia awmte thisen hmun khat, unau kan ni tih kan inhriatthar leh hi MSU chuan a duh a ni," a ti bawk. Festival buatsaih tur hian thuken pali-inpumkhatna tha neih, thu leh hla hmanga inunauna tha siam, hnam nun leh ziarang humhalh leh chawisan leh Chhinlung chhuak Zofate inunauna tha neih, te chu a tum an ni. Khawmpui neih chhung hian Zofate hnam lam chi hrang hrang 60 chuang entir tum anih bakah zaithiam zai ngaihthlak te, seminar neih te tum a ni bawk. Inkhawmpui neih chhung hian khuallian ah Mizoram Chief Minister Lal Thanhawla, Chin State Chief Minister Hu Ngai leh MoS C.Ngunlianchunga te khuallian an ni ang. Ruahman dan chuan inkhawmpui a kal turte hian November ni 3 ah Aizawl an chhuahsan ang a, November ni 8 ah Hakha atangin an lo let leh ang.