ZALEN March 1, 2026: Vawiin khan India ram hmun dang rualin Mizoram-ah pawh District hrang hrang-ah pawh chhul hmawr cancer thlentu Human Papillomavirus (HPV) laka invenna tur vaccine pek runpui chu kalpui tan a ni.

Prime Minister Narendra Modi chuan chawhma dar 11:30-ah HPV vaccine chu hmeichhe tleirawl kum 14 tling tawh, kum 15 la pumhlum lote tan sawrkar damdawi in hrang hranga a thlawna lak theih turin India ram pum huapin Ajmer, Rajasthan atangin a tlangzarh a. Mizoramah chuan Health & Family Welfare Minister Lalrinpuii chuan chawhma dar 11:45-ah Civil Hospital Auditorium-ah tlangzarhin, District tana HPV vaccine pek runpui hawnna chu hmun hrang hrangah neih nghal a ni.

HPV Vaccine pek runpui hi thla thum chhung kalpui tur niin, hmeichhe tleirawl kum 14 pumhlum tawh, kum 15 la tling lote hnenah ni tin damdawi in (health facilities) hrang hrang — PHC, UPHC, SDH leh DH-ah te pek thin a ni dawn a mi

Tun dinhmuna HPV Vaccine hman mek hi GARDASIL niin, HPV Strain pali — 6, 11, 16 leh 18 te laka venna a ni a, vawi khat chiu (single dose) zela pek tur a ni.

Chhul hmawr cancer endikna (screening) hi Health & Wellness Centre leh a chung lam damdawi inahte a thlawna kalpui mek a ni bawk.

Chhul hmawr cancer hi India rama hmeichhe cancer hluar ber dawttu niin, kum tin mi 1,20,000 (nuai khat sing hnih) velin vei thar leh mi 80,000 (sing riat) velin thihpui anga chhut a ni a. Hemi ven nan hian HPV Vaccination Programme hnuaiah hian India ram pumah kum tin hmeichhe tleirawl kum 14 mi vaibelchhe 1.15 chu HPV Vaccine hi pe turin ruahman a ni.