ZALEN March 1, 2026: Nimin khan Prime Minister Narendra Modi chuan Ajmer, Rajasthan atangin chhul hmawr cancer venna, HPV vaccine’ a tlangzarh a. A tlangzarh zawh hian Mizorama vaccine pekna tur hi Civil Hospital, Aizawl auditorium-ah Health Minister Lalrinpuii’n a tlangzarh ve nghal a. Ruahman dan chuan Mizorama tleirawl 12,720 hnenah vaccine hi pek tum a ni.

Mizorama tlangzarhtu, health minister chuan Mizoram chu mihring cheng atanga chhutin India-a cancer vei tamna ber a nih thu sawiin, “Cancer kan tam chhan hi sarep leh thau tha lo ei atang leh vaihlo kaihhnawih kan hman nasat vang a ni ber a. MUHCS-a pawisa pawh cancer vei enkawlna atan a kal tam hle,” a ti.

HPV vaccine chungchang sawiin, “India-a hmeichhiate zingah hnute cancer hluar berin chhul hmawr cancer hian a dawt a, HPV vaccine hian chhul hmawr cancer thlentu 99.7% a ven theih dawn vangin a lawmawm hle a ni,” a ti bawk.

Ruahman dan chuan vaccine hi tleirawl kum 9-14 inkarte hnenah pek tur a ni a; mahse, sawrkar laipuiin kum 15 leh thla thum chin pek a phal vangin hemi inkar hi nimin atang khan PHC, UPHC leh damdawi in hrang hrangah pek tan a ni a. Vaccine hi tum khat chauh pek tur niin a him tawka mi thiamten an ngaih a ni a. January 7, 2026 khan Mizoram a thleng tawh a ni.