Han en mai chuan tlangval zawi nen nawn hmel tak a ni a, khawlaia zan rei thu emaw tih a awl khawp ang. Mahse zing chhun zan zawma hnathawk, nupui fanau chawm nana theih-tawp chhuah a lo ni zawk a, Bazar Bungkawn kawng ânah plastic dawhkanah lei tur an chhawp dal a, mi dang awmte chu amah pui bawm tura a rawih te an ni. Ni en laiin class a laa, khaw thimah zan mengreite ei duh zawng momo, ar hem hmin, sa tui hang zuarin Veng kawn hrang hrangah an insawn kuala, khawtlang lamin 'buai palh' awm theiah an in veng bawk nen inphona hmun nghet nei lovin zan tin kar khat chu an inpu kual tawh a ni. Hmuntha khua atanga beisei-na nena a rawn a pem luh hma; pawl 12 a zir zawh hlimin Chennai-ah inzir paha hnathawk turin lo awmsil tawh hmelhriat a zui ta rawih a, chu chuan vawiin thleng a nghawng phah a. Remchanna a haihchham thin thu sawiin, “Ka pi bula seilian ka ni a, mi rethei chhungkua background tha lo inkara sei lian ka ni a. 2010 khan Aizawl-ah miin ah awmpui anga inhlawhin lehkha ka zir pah a, ka awm kual nual hman a. Chennai a inhlawh leh zirbelh turin ‘risk’ tak meuhin ka kal a, hotel management lam ka thlang a, Taj leh Redison-ah management training laia mi tam tak a hahthlak vanga beidawnna ‘house keeping' (pindan tihfai, khum siam, ek in tihfai) atangin bul ka tan a, kum 4 ka awm hnuah Supervisor-in ka chhuak a, Aizawl-ah bul tan ka tum vang a ni,” tiin kum 24 chauha upa Lalduhawma chuan a chanchin sawinaah Zalen a hrilh a. Harsatna an tawh mek thu Zalen palai a hrilh a, an inphona tur Veng-a khawtlang hruaitute ziakin an dil hmasa a, a tlangpuiin an dilna hnawl a ni thin a, chumi vang chuan hlep aiin an hloh phah fo thu leh an phalna hmunah 11PM hnu lamah phalsak an ni meuh lo. "Min dawrtute hi zurui leh KS te an ni ngai mang lo, mi pangngai zan hnathawk ril tam eitur dap te, inkhawm bangte, leng chhuak emaw haw lam an ni deuh veka, vawi 1 tih loh chu buaina siam an awm loa, min dawrtute hi an thu khawtlai ngai lo a, kan fun saka an hawn mai thin a, hnawksak ni lo turah kan inngai,' tiin an nihphung a sawifiah a. Zan khat erawh an inphona Veng pakhatah buai a chhuak palha, a mi chhawr thiam loh nia a hriat vangin bantir mahse insawn turin khawtlang hruaitute'n an nawr chhuaka, chumi hnu atang chuan a tirah Veng-in phal mahse zan 2/3 hnuah hnawt haw deuh zel an nih thu leh felfai taka inphona nghet, hmun langsar nei Veng, awm thei se a tih thu a sawi a, hlep nei tur chuan inpho chhung a rei a ngai a, dar 12 phaltu awm se tih chu a duhthusam a ni a. “Loh theihloha min chhuahtirna Veng pawh kha mi an fel em em a, hnathawk thlan uluk a ngai hle tih min zirtirtuah ka ngai a ni,” a ti. Zan dar 12 thlenga phalsaktu awm thei se tih chu a duthusam a ni a, Hlep awm tur chuan inpho chhung a rei a ngai si a, tuna an belh chawt Veng chuan an khawngaih viau laiin 'dan' an lo siam hman avangin 11 PM hnu lamah inseng hawi a ngai thin a, darkar 1 pawhsei nise chu an chhunzawm zel theih an inring. Sum nei miah lo mahse eng tin tin emaw in Chanmari West, Kawipui ah LT Facilities tiin hotel management thla 3 course a zirna in a siam a, chhunah a thiamna chu midangte a zirtir a, tlai lamah zan lama a thutpui tur ei lehin a siam thin a, Pathianni chiah a awl niin a sawi bawk. Zalen palaiin an inphona hmuna dawrtu pakhat chu a ngaihdan zawtin, 'Harsatna tam tak hmachhawn mek chungin thingtlang atanga khawpuia pem, tam tak chu an hna vanga zan rei thlen ngai an ni thin a, riltam hnem ei tur a awm hi a remchanga, duhthusamah chuan zan atangin zing thleng inhawng thei awm sela ka ti mah zawk a ni,' a ti. A ngaihdanah tuna nu leh pate chhuan hi lehkha zir zawha hna hmu nghal mai, hrehawm lian tham hre hman lo tam tak an zingah an awm a, tunlai thalai hahzia an hriatthiam pui lo pha lo zawk a ni.