ZALEN July 12, 2026: Mizoram Synod hnuaia Synod Social Front kaltlangin chhungkaw harsate khai chhuahna programme kalpui mek niin kum kalta khan chhungkaw 48 hnenah tanpuina sum pek a ni.

ZALEN-in Synod Social Front thawktute hnen atanga thu a dawn danin chhungkaw harsate khai chhuahna programme hi sawrkar kum kalta, 2025-26 khan kalpui tan niin hemi atan hian Synod chuan budget-ah Rs. nuai 50 a dah a. He sum hmang hian chhungkaw 48 chu tanpuina pek mek a ni a, hriat theih chinah sum hi tangkai taka hman mek a ni.

Chhungkaw harsa khai chhuah an tum dan tlangpui sawiin Synod Social Front thawktute chuan, “Chhungkaw harsa, talent nei tha si, sum leh pai lama harsatna nei khai chhuah hi a tum ber a ni a. Ruahman dan chuan sum hi vawi khata pe mai lovin hmanrua leh thil dang lei nan pek phawt an ni a, an hnathawh leh hmasawn zel dan enin an mamawh dan azira pek chhunzawm zel an ni a. Sum hman dan leh an hnathawh a inmil loh chuan sum hi pek chhunzawm loh tur a ni,” an ti.

Pawisa hi chhungkaw khai chhuah turte hnenah hian pe lovin pastor biala puipate hnenah pek phawt a ni a, anni hian n an mamawh dan azirin an lo pe chhawng ve leh thin niin an sawi bawk.

Chhungkaw harsa khai chhuah tur an thlan dan sawiin Synod Social Front thawktute chuan, “A bul tan nan hmun harsa leh chengker deuha awm pastor bialte thlan deuh bik niin bial standing committee-in an bial chhung atangin mi pahnih zel thlang an chhuak a, tunah hian mi 48 hnenah tanpuina hi pek mek a ni a. Bial hian khai chhuah leh puih tlak deuhte dapin heng mite hnenah hian tanpuina hi pek a ni,” an ti.

Tun dinhmuna an puihte hi a tlangpuiin electric siam thiam, mobile siam, mistiri, ranvulh te an ni tlangpui tih an sawi a. An pawisa pek hi eizawnna tur bultanna a ni tih an sawi bawk.

Synod chuan chhungkaw harsate khai chhuahna programme atan hian kumin 2026-27 pawh hian Rs. nuai 50 bawk budget-ah a dah leh a, kumin pawisa erawh a dawngtu tur tihfel a la nih loh avangin hman a la ni lo a ni.

Thlalak - AI hmanga siam