February 22, 2023; Home minister Lalchamliana tarlan danin, chiahpuam sum hmuh let leh (recovery) Rs. 7,30,51,853 chu SBI, Aizawl Branch ah dah niin, engtia kalpui zel nge tih ah court thubuai kal lai a nih vangin, judgement order nghah mek a ni.

Serchhip bialtu MLA Lalduhoma zawhna home minister in ziaka a chhan danin, chiahpuam sum chu depositor te hnenah pek a la awm lo a, hmuh let leh zawng zawngte chu Addl. DC (Establishment) leh SDO (Sadar), DC office, Aizawl hming SBI, Aizawl Branch ah dah a ni.

Chiahpuam sum hmuh let zawng zawngte chu thil dangah hman a la ni lo a, tun thlenga a pung (interest) zat chu Rs. 10,83,25,772 a tling tawh a, engtia tih nge sawrkarin a tum tih zawhna chu court thubuai kal lai a ni a, judgement order nghah mek a nih thuin a chhang.