Court sang zawkin thu a pek angin hun rei tak chhung buaipui lo ni tawh Chiahpuam sum sem dan tur chu Aizawl DC,Police leh Finance department lamin an buaipui mek a. High Court lam chuan Chiahpuam sum sem dang tur chungchangah Aizawl DC a lo hriattir tawh a, Police leh Finance Department lam rawnin sem dan chu tur thuthlukna siam tura tih a ni mek a ni. Chiahpuam sum hi kum 7 chuang chu a buai tawh a, sem dawn awm anga sawi te awm uiah uiah thin mahse vawiin thlengin a tak hmuh tur a la awm thei lo a ni. Tunah hian hian bank account a hrana siamah cheng vaibelchhe 14 dah a ni a, in leh ram hren mek a awm nual bawk a ni. A tawp hnu pawh khan a nghawng a thui hle mai a hun eng nge maw chen chu media lamah pawh a lailum a luah a nih kha. Chiahpuam nghawng buaina hian chhungkaw tam tak a tiphel a, chhungkaw thenkhat chu an tlachhia a, thil rapthlak tak tak tuar te pawh an awm a ni. A tawp lamah pawh khan thu a saisa nuai mai a, Association te din hial niin sum dahtu hi a zat tak pawh hriat chian hleih theih loh nia sawi kha a ni thin a, dah nia inziak lut thenkhat te chu inhnamhnawihna nei lo nia sawi an ni a; hminglan hlauh vanga ngawi hlen te pawh an awm a ni awm e. Tunah sem dan tur rel tih te a lo ri leh taa, a buaipuitute hian an chingfel mai dawn em? tih hriat la ni lo mahse mipui rilruah chuan dik taka tih a ni dawn em? tih hi lang hmasa ber tur chu a ni. Chiahpuam a tawp dawn lam khan titi lengvak mah se rintlak ni thei awm anga lang a awm nual a, a buai tak tak hmaa hriat lawkna neia inthiar fihlim hman an awm thu kha a ri ring hle a.Thuneitute’n pawisa an kawlkhawm tan tawh hnuah pawh thil ti thei te kaltlanga mahni pawisa la let leh thei te pawh an awm thu a awm nual a nih kha. Chiahpuam sum sem hi thil awlai lo tak tur a ni a, a buaipui tu tan pawh thil phurawm zawk zawk chu a ni hauh lovang. Engngemaw hlek awma thil rihluai thei la awm a nih avang hian rilru fim tak hmanga hmalakna chi a ni tih hriat reng erawh a tul khawp ang.