Aizawl October 30, 2023 : Tukin khan Mizoram SSA Teachers Association (MSSTA) hruaitute chuan an pawl mamawh leh danin a remtihsak ang ngei an hmuh theihna a nih beiseiin Chief Minister Zoramthanga chu a office-ah an hmu a. MSSTA pawhin MNF a sawrkar leh ngei a duh tih an hrilh.

Chief Minister hian MSSTA te chu an thu thlen te a hriatthiampui thu a lo hrilh a. Tun dinhmunah hmalak mai theih anih loh thu sawiin, "Sawrkar tharah Cabinet meeting thuthlukna lo siam tawh anga a chak thei ang bera hmalak a ni ang," tiin a lo hrilh. MSSTA hruaitute chuan thlamuanthlak an ti a, an chanvo diktak an chan theihna tura hmalakpui tumtu MNF a sawrkar leh ngei an duhsak thu an sawi ve bawk.

MSSTA hruaitute chuan an chanvo danin a remtihsakte chan ngei tum a, Gauhati High Court, Aizawl Bench-ah sorkar khinna an lo thehluh tawh thu te. Court thuchhuak hian post creation/Regular Vacant post/regularitions scheme siamsak tura sawrkar a hriattir tawh thu te an sawi. RTE Act-in chanvo a pekte leh NHM leh CSS hnuaia thawktu te nen an kalphung a inperhsan thute an thlen bawk.

SSA zirtirtu te chuan Court case chungchanga file kal mek chu sawrkarin Judgement Order hi appeal turin thuthlukna a siam an ti a. Amaherawhchu, Chief Minister hmalakna avanga khinlet lo tura October 3, 2023-a Verbal Instruction an dawn thu leh hemi avanga an lawm thu CM hnenah hian an thlen bawk a ni.