Aizawl February 17, 2023: MPCC Action Committee chuan J. Thankima College-in NAAC Accreditation A+ an lawmna a khuallian tur Chief Minister Zoramthanga chu Congress ten dan tum anga thuthanga awm chungchangah sawrkar lamin mipui ti ralkhel zawngin hma an la zawk tiin, CM dang turin ruahmanna an siam lo tih thuchhuah an siamah an tarlang.

MPCC chuan, "Vawiin 17.2.2023 chhun dar 12:00-a J. Thankima College-in NAAC atanga Accreditation A+ an hmuh lawmna Vanapa Hall-a an neih turah khuallian niin Chief Minister Pu Zoramthanga'n a hmanpui dawn tih J. Thankima College thuneitute chuan MPCC President Lalsawta chu ni 16.2.2023 zan khan an hrilh a, an programme neih tura ruahman lawkna an neihte tibuai lo turin an ngen nghal bawk," an ti.

Congress thuchhuak chuan, "Pu Lalsawta hian J. Thankima College ngenna hi zahawm a ti a, vawiina MPCC Action Committee-in Programme siam tura ruahmanna an neihah J. Thankima College Programme tibuai thei turin Chief Minister Zoramthanga chu an dang dawn lo tih a lo hrilh a. MPCC President sawi angin vawiinah kar tina MPCC Friday Political Session Congress Bhavan-a neih thin bak programme dang siam a ni lo. Vawiinah Congress Party hian khawi hmunah mah mipui che vel tibuai turin programme a siam lo a ni," a ti.

MPCC chuan, "Sawrkar lam chuan mipui tiralkhel takin Police thahnem tak Aizawl Press Club bul leh Mizofed Petrol Pump bul Treasury Square, Aizawl-ah a duty tir a. Chief Minister Pu Zoramthanga ngei pawh hian Assembly House-a Session neihna hi chawhma lam khan a chhuahsan," an ti.

Congress chuan J. Thankima College-in Grade sang zawk an nei hi kan lawmpui em em a, a lawmna programme pawh tluang taka an neih theih nan duhsakna sang ber kan hlan e. Hetih laia Chief Minister berin dawt hmanga Congress-in an dan avanga J. Thankima College Programme Vanapa Hall, Aizawla neih turah a kal thei lo anga a lo sawi hi dawta inpuh hmingchhiatna a ni a, a lawmawm loh kan ti hle a ni, an ti.