ZALEN June 17, 2026: Mizoram Pradesh Congress Committee aiawhin an Secretary, Lalhmachhuana chuan vawiin khan ziakin Chief Minister hnenah Petrol leh Diesel-a Mizoram sawrkarin Cess a lak chu titawp rih tura a ngenna a thehlut.

He lehkha-ah hian Lalhmachhuana chuan, Khawvel hmun hrang hrangah Oil man a pun chhoh zel avangin India ram leh Mizoram ah pawh Petrol leh Diesel man a lo pung chho ta a. Kan hriat theih chinah Mizoram ah bik Petrol leh Diesel man a san ber tum a ni hial awm e. Heti taka POL man a lo pun chhoh tak avang hian mipuite leh lirthei a eizawng tam takin harsatna an tawk chho mek a ti a.

POL man a pun chhoh tak avanga mipuiin harsatna lian zawk kan tawh zel loh nan Mizoram sawrkarin September 2024 atanga Petrol leh Diesel atanga Social Infrastructure & Services Cess Rs.2 per litre leh Road Maintenance cess Rs.2 per litre, a vaiin litre khat a cess Rs.4 zel a lak mek hi mipui phurrit chhawk zangkhai nana titawp rih turin Mizoram sawrkar an ngen a ni. 

Lalhmachhuana chuan, "Mizoram sawrkar hian VAT atangin Petrol leh Diesel ah chhiah tam tawk tak a lak sa reng tho avangin POL man tipung lehzual tura litre khat zela Mizoram sawrkarin cess Rs.4 a lak belh mek hi mipuite zangkhai zawk nana sut turin MPCC chuan Mizoram sawrkar kan ngen a ni," a ti.

"Mizoram sawrkarin Petrol leh Diesel atanga litre khat zela cess Rs.4 a lak mek hi June thla, 2026 ral hma ngei a sut turin Mizoram sawrkar kan ngen a. Kan hun tiam chhunga POL atanga cess lak hi tihtawp a nih loh chuan Mizoram Pradesh Congress Committee chuan mipui te thlavang hauh turin hma a lak chhunzawm zel dawn a ni," a ti bawk.