ZALEN September 1, 2025: Vawiin khan Thenzawl-a Village Councils, NGOs leh khawtlang mipui tangrual chuan Thenzawl Peace City lawmna inkhawm an buatsaih a, bialtu MLA, Chief Minister Lalduhoma chu khuallian niin, B. Lalchhanzova, Supply Minister chu khualzahawm a ni.

Jt. YMA Hall, Bazar Venga lawmna buatsaihah hian Chief Minister chuan, "Kan ram hian khawpui changkang leh tunlai, fel taka duan sa, kan mamawh ve tawh a. Thenzawl hi chutiang din nan chuan a rem hle. Chief Minister ka nih hnuah Prime Minister nena kan inhmuh tum hnihnaah khan Pu Narendra Modi hian ka nunkawng te min zawt a, Pi Indira Gandhi nena kan thawh dun dan te, IPS hna ka bansan chhan te, MP zinga Anti Defection Law hmanga paih hmasak ber ka nih chhan te chu Mizoram buaina a lo reh a, muanna a lo awm theih nana ka thiam ang anga ka beih vena vang a nih thute ka hrilh ve a ni."

A hnenah hian, "Hei, Mizoram-in remna kan nei ta a, India rama inremna hlawhtling ber zinga mi niin, state ralmuang ber kan lo ni ta a. Planned City kan nei bawk si lo va, mipui nuaih sawm chen theihna tur Peace City min pe rawh tiin ka dil ta a ni." 

"He khawpui hi Aizawl sawn tumna a ni lo va, chutiang zawngin kan sawi ngai lo, Mizoramin khawpui mawi leh changkang tak kan neih ve theih nan khawpui thar din kan tum zawk a, Thenzawl tan bik pawh a ni lo va, Mizoram tan a ni," a ti.

"Master Plan siamna chauh min la pe a, a taka hmalakna tur hi kan la ngaihtuah zel ang. 15th Finance Commission sum chuang bang, Prime Minister kuta awm mek chu dil kan rilruk mek," a ti bawk.

Chief Minister chuan, "Kan hriat angin tun thla ni 13-ah Sairang rel station hi Prime Minister-in a rawn hawng dawn a. Peace City lungphum pawh a rawn phun theih kan beisei mek. Rel kawng hian Thenzawl Peace City hi thleng phei thuai se kan duh avangin hma kan la mek bawk," tiin, Thenzawl Peace City tobul leh hmachhawpte a tarlang a. A taka kan thawh hunah insenghawi a la tul nasa dawn a, mipuiten inhawng taka lo dawnsawn a ngai dawn a ni, tiin mipuite inbuatsaih turin a chah a ni.

Mizoram sawrkara I&PR Department chuan Press Release an lo tih chhuah tawh-ah Chief Minister Lalduhoma'n Chief Minister a nih hnua New Delhi a zin vawi hnihnaah khan Thenzawl Peace City dinna tur hi India Prime Minister Narendra Modi hnenah a dil a. A hnu reiloteah a dilna ang hian Central sawrkar chuan Thenzawl-a mipui nuaih sawm vel khawsak theihna tur khawpui, kilometer 108 thuta zau Master Plan siam a rawn phalsak a. Ministry of Housing & Urban Affairs kaltlangin Master Plan siamna tur hi cheng vaibelchhe sawm (Rs. 10 Cr.) a rawn pe tih an lo tarlang tawh a ni.