ZALEN January 23, 2026: Chief Minister Lalduhoma chuan vawiin khan 2025-a rubber atanga nuai Rs. 70 chuang lalut Chungtlang-a rubber chingtute huan a tlawh a. An hmalaknate enpuiin, Chief Minister Rubber Mission hmanga hmalak zui zelna tur a en bawk. Land Resources, Soil & Water Conservation Department (LR, S&WC) Minister Lalthansanga chuan a tawiawm a ni.

Chief Minister chuan Mizoramah Hectares 50,000 vela zauah rubber hi a chin theih niin an hria a, CM Rubber Mission hmang hian kum 5 chhunga Hectares 11,500 a zaua chin khah an tum tih a sawi. A sawngbawlna khawl thar 100 leina an approve tawh a, kumin hnai huna hman theih hman an tum, tiin sawrkar hmalakna tlangpui a sawi.

Chungtlang Rubber Producer Society President Malsawmthanga chuan he hunah hian CM Rubber Mission phase 2 hnuaiah Chungtlang, chhungkaw 105 chenna khua hian hectares 95 an hmu a, phase 2 atanga dawng tam ber pathumna an nih thu report. Tunah hian lo an vat chho mek a, CM Rubber Mission Phase 2 ah hian ram hectares 2575 a zau-ah rubber kung nuai sawm pakhat chuang phun a nih tur thu a report-ah hian a tarlang.

Chungtlangah hian kum sawm liam taah khan rubber chin tan a ni a, kum 75,000 vel an phun a, an dam kim vek lova. Kum 2024 atangin kung 30,000 vel an hnai tan a, khawl an indaih loh avangin an rubber zawng zawng hi an la hnai thei lo nia sawi a ni a. Nikum 2025 chhung khan an khua hian rubber atangin Cheng nuai 70 lakh vel an lalut a ni.

Sawrkar chuan an rubber huan kawng hi tun hnaiah a siamthat sak a, concrete pavement-a siam zuina tur Rs. 50 lakh a pe bawk. Sawrkar hian hmun hrang hranga rubber chingtute tan khawl 100 lei turin hma a mek bawk a ni.