ZALEN September 19, 2024: Vawiin khan Mizoram Sawrkar Flagship programme 'Bana Kaih (Handholding) Scheme' chu Chief Minister Lalduhoma'n Vanapa Hall, Aizawl-ah a tlangzarh. Scheme book pahnih 'Bana Kaih Mizoram Handholding Scheme' leh 'Thlai thar hralh dan tur kaihhruaina tawi' bakah Digital Portal a hawng nghal bawk.

Lalduhoma chuan, hun rei tawh tak atanga an suangtuah tawh thin 'Bana Kaih Scheme' tlangzarh a ni ta chu lawmawm a tih thu sawiin, policy a hlawhtlin theih nana theihtawp chhuahtu leh thlawp tlat thintute inpekna ropui a tih thu a sawi a. Thlai thar 4 lei nan sum dah fel a nih thu leh society kaltlanga lei tura ruahmanna duan a nih thu te sawiin, society chu politics tel lo, hruaitu tha leh mi thahnemngaite kaihhruai a ni tur a ni, a ti.

Sawhthing bikah rate tha zawk Rs 50/- chunglama hralh theite chu sawrkarin a buaipui dawn lova, Rs. 50/- tling lova an hralh erawh chuan a tlin lohna zat kha sawrkarin a hnawhkhah sak thung ang. Tin, thlai thar lei tura sawrkarin a lo puan tawh te bakah khan Kolasib leh Mamit District-ah kumina buhhum tharte Kg-ah Rs 30/- zela leisak tum a nih thu a tarlang bawk.

Agriculture & Farmers Welfare Minister PC. Vanlalruata, Chairman, Mizoram Agricultural Marketing Board chuan, kuthnathawktute dinchhuah nana an au hla Bana Kaih Scheme hawn fel a ni chu lawmawm a tih thu a sawi a. Vawiin thleng hian thlai thar lei sak theih tur mi 45585 vel portal-a ziah luh an ni tawh a, a zat hi la danglam thei a ni.

Portal-a inziaklut zinga Sawhthing chingtu inziaklut tawh 25,154 atangin quintal 10,84,975; Aieng chingtu 3,414 atangin quintal 77,492; Hmarchate chingtu 8,517 atangin quintal 36,774 leh Hmunphiah chingtu 8,500 atangin quintal 1,20,000 thar chhuah beisei a ni a ti. Marketing bakah link road-te ngaihpawimawh tel an tum thu a sawi bawk.

A guideline kimchang hi dipr.mizoram.gov.in ah en theiha dah a ni.

https://dipr.mizoram.gov.in/uploads/attachments/2024/09/60376305338d47b51ce799ca5bd9f299/notification-for-the-mizoram-bana-kaih-handholding-scheme-for-gazette-final-edit.pdf