ZALEN August 13, 2026: Chief Minister Lalduhoma chuan vawiin tlai khan Aizawl Smart City Limited sum Rs. 16.06 Crore senga chei that Mizo High Sikul Field chu a hawng. UD&PA Minister K. Sapdanga chu khualzahawm a ni a, EF&CC Minister Lalthansanga leh Health Minister Lalrinpuii ten an telpui bawk.

Chief Minister chuan, "He project hi sawrkar hmasate bul lo tan kha a ni a, hmalakna tha tak an lo kalpui avangin lawm takin kan chhunzawm a. Vawiinah kan lo hawng thei ta a, an chungah lawmthu kan sawi a ni. A tirah project hming dang an lo vuah a, mahse kum tam tak Mizo High Sikul Field kan lo tih tawh, infiammi tam takte lo chherchhuak tawh kha a hming han thlak atan chuan a uiawm lutukin kan hria a, Mizo High Sikul Field tiin kan thlak leh ta a ni," a ti.

Mizo High Sikul Field enkawl zuitu tur Management Committee-ah hian sawrkar aiawh bakah Zarkawt Local Council-te, tlawmngaipawl hruaitute leh Mizo High School Principal te an awm dawn a. Mizo High Sikul leh HSS te chuan man chawi lovin an duh hun hunah an hmang thei dawn a, Zarkawt LC leh NGO te, Zarkawt Presbyterian kohhranten a thlawnin an hmang thei ang a. Parking Area enkawlna hna pawh hi Zarkawt Local Council kutah dah a ni.

Kum 130 liam tawhah khan field awmna hmunah hian Missionary ten Biak In an lo sa tawh a. Chu mi hriatrengna chu awm thei se tiin Zarkawt kohhranten rawtna an thlen a, sawrkar pawhin rem a ti a. Biak In hmasaber ang turin In te dah a ni a, tawngtai nana hman tur a ni a. Chief Minister chuan hei hian he hmun hi a tihlu zual a ni a ti.

Lalduhoma chuan, "He hmunhma thar hi zirlai naupang te, thalaite leh infiammi zawng zawngte tana Infrastructure hlu tak a ni. Ka lawmpui a, tangkai taka lo hmang thin turin duhsakna kan hlan a. He project hlawhtling taka kalpuitu UD&PA Minister leh a thawhpui te, Aizawl Smart City Limited thawktute chungah lawmthu a sawi.

Chief Minister chuan Assam Rifles te chhuahsan Zarkawt YMA Hall bula ram pawh len khaw thawnna Park atan siam mek a, hna thawh teuh tawh a nih thu a sawi a. Zarkawt-in hetiang lam chi centre dang hi an nei leh thuai dawn. Aizawl veng hlun hote hi tun hnuah vantlang hnunhma tlachham an ni duh viau mai a, chutiang a nih laia Zarkawt khawtlangin hetiang hmun tha tak an nei hi an vannei a tih hle thu a sawi.

Khualzahawm K. Sapdanga pawhin thu sawiin, bialtu MLA a nih angin an bial chhunga Infrastructure thar tha tak an neih avangin lawmthu a sawi a. Hetiang ang project dang hi Mizoram-in a nei lo a. He field hi kum tam tak chhung chu Aizawla football zirna langsar ber a ni reng thin a, tournament khelhna tham tling lo mahse inzirna hmun tha a nia. Hetia sawrkarin a siam that phei hi chuan tunhma aia tangkai zawka thalaiten an hman a beisei tih a sawi. Aizawl khawpuiin a mamawh parking zau tak a nei chuan a tihlu zual a, Mizo Engineer-te kutchhuak ngat a nih avangin a chhuanawm a tih thu a sawi.

He Field chei tharah hian a hnuai lamah lirthei dahna chhawng hnih a awm a, Four-Wheeler – 80 leh Two- Wheeler – 47 a dah theih a, tui litre 35,000 dahna a awm a. Public toilet leh Security Room a awm nghal a. Field chungah a kualin kea kalna (elevated jogging track) te, Field sira Cycle a tlanna kawng te, Cricket practice Pitch te a awm a, Stage, toilet leh store room te a nei a, naupang infiamna hmun leh open Gym a awm a, huan (garden) a nei a, Water Cooler a awm bawk a. Mizorama Biak in hmasa ber dinna (6.10.1896) hmun a nih angin, Biak in hmasaber ang tak in te sak a ni bawk.

A field pui hi phullem phah a ni a, a sei zawng hi meter 73.35 leh a zau zawng meter 33.12 a ni a, mi 310 thut theihna a awm a ni.

Hna hi Lushai Engineer te thawh niin June ni 10, 2022-ah Contract Agreement ziahpui an ni a, February ni 4, 2023 ah hna an tan a, kumin August ni 10 khan an zo fel a ni.