ZALEN January 29, 2026: Chief Minister Lalduhoma chuan vawiin khan a office-ah National Cadet Corps, Mizoram Group Headquarters chu official-a hawnna a nei a. Assam state atanga awp thin NCC Mizoram chuan Group Headquarters a nei tawh dawn a ni. Sports & Youth Services Minister Lalnghinglova Hmar pawh hawnnah hian a tel.

A hawnna hun tawite an hman zawhah Chief Minister hian Minister te, Maj Gen Anurag Vij, ADG, NER leh Brig GS Arora, Commander, Group Hq, Aizawl te nena inkawmna an nei zui a. An awmna hmunhma tur an sawiho nghal a, state sawrkarin an awmna tur ram a pek theih chuan an hmunhma chu an insak theih thu an sawi a. Ram pawh hi neih hlen tura inpek a ngai lova, luah hawh mai tur chi a nih thu sipai hotute chuan an sawi.

Tunah hian Mizoramah NCC unit pali, cadets 8000 vel an awm mek a. Group Headquarters nena an awm chuan an ti lian chho zel dawn a ni.