ZALEN January 22, 2025: Chief Minister Lalduhoma chuan Kalphung thar Mipui Sawrkarin kan ram rorelnaa Pathian ram a thlen theih nan leh Sawrkar hmalaknain mipui tana hmasawnna tluantling a thlen theih nan Sawrkar lai thawhpui thei tur LC/ VC Sawrkarin a mamawh tih a sawi.

ZPM Thenzawl Block huam chhunga VC Candidate tur puanna Thenzawl Vantawng Group YMA Hall-a neihah Duhoma chuan, "LC/VC te hi Sawrkar kut leh ke pawimawh tak an ni a, LC/VC tha nei veng leh khua chuan hmasawnna tam tak an khawtlang tan an chawlut thin a, chutih laiin Opposition LC/VC te zingah sawrkar thawhpui hleitheilo an awm hian, Sawrkar hmalaknain mipui a thleng zo lo fo thin a ni."

"ZPM Party chuan Pathian leh mipuite duhsakna changin Sawrkarna kum khat zet kan chelh ve ta a, hmasawnna hna han thawh tak tak dawn chuan Sawrkar lai thawhpui thei LC/VC an pawimawh zia a takin kan tawng chho mek a, kan ram rorelnaa Pathian ram tundina tur leh hmasawnna mipui thleng phak kan neih theih nan Sawrkar thawhpui thei tur LC/VC kan mamawh hle a ni," a ti.

Chief Minister chuan,"Local Council leh VC inthlanah hian Ruling Party tan Candidate thlan a har thin hle a, mi tha tam tak leh Candidate awm tak tak an lo awm tawh vang leh rorel lai party thawhpui thei tur mi tha engemaw zat an lo awm ve tawh vang a ni. Chutiang dinhmun chu ZPM Party pawhin kan tawng mek a, kan hotuten Candidate tur atana an ruat apiangte thahnem ngai taka thawhpui turin Zoram dung leh vanga lungrualpuite kan ngen a ni," a ti bawk.