ZALEN May 5, 2026: New Delhi-a cham mek Chief Minister Lalduhoma chuan nizan khan Union Minister of Road Transport & Highways Nitin Gadkari a kawm a. Mizoram chhunga Kawngpuite siamthat dan tur leh thawm that dan tur te an sawi dun a, Union Minister hian Chief Minister thil thlen te chu a thei anga hmalak sak a intiam hlawm a, state sawrkar-in hma an lo lakna tur te a hrilh bawk.

Chief Minister-in Aizawl -Thenzawl kawngpui National Highway-a puang tura a lo ngen tawh thin chu a sawipui a, Nitin Gadkari chuan DPR siam mek a nih thu leh sanction thuai tum a nih thu a lo hrilh a, Mamit to Bairabi NH-06 Spur chu strengthening ti turin Chief Minister hian a ngen a. Union Minister hian sanction nghal a nih tur thu a lo hrilh. A senso tur awm ang pawh an sawi dun nghal a ni.

Vairengte to New Vervek NH-306A kawng chhuat siam tha tura a ngenna pawh Nitin Gadkari hian state PWD ruahmanna (proposal) a siam that ngai thenkhat te siam that a nih hnuah sanction a nih tur thuin a chhang a ni.

NH-502 Zero to Siaha double lane-a siam sak tura ngenna chu Land Acquisition man sang lutuk tihhniam dan lo zawng turin state sawrkar a lo ngen let a, sanction thuai tura MoRTH in hma an lak tur thu a lo hrilh a ni.

NH-108/NH-44A kawnga Teirei Bridge leh Langkaih Bridge chu Tripura nena inkalpawhna pawimawh a nih avangin lei tha mamawhna a sang hle a. A thawhna tur sum sanction thuai a tul thu a thlen a. Union Minister hian DPR te siam that a (modified) submit ran ni se, MoRTH duh dan ang a nih chuan sanction thuai a ni ang, tiin Chief Minister hi a hrilh a ni.

National Highway ni thin, double lane alignment thar a kal tak avanga ngaihsak zui loh a awm, state PWD a la hlan fel si loh kawngpui pawimawh paruk te One Time Improvement chungchang a sawipui a. Nitin Gadkari hian National Highway road hlui an nih ngei chuan sanction a, resurface tur a nih thu Chief Minister hi a lo hrilh.

Mizoram chhunga kawngpui te an lo tlo zawk nan kawngpui project thar te chu concrete road-a siamsak tura a ngenna chungchangah Union Minister hian Cement factory lian nen inbe rem a, cement man tlawm deuh zawka lei a, concrete road siam theih a rinawm thu sawiin, MoRTH leh NHIDCL officer te pawh Bitumen man 40%-a a to chhoh tak avangin ngaihtuahna seng a, hma la turin a hrilh nghal bawk a ni.