Aizawl February 25, 2023: Chief Minister Zoramthanga chuan vawiin khan Zarkawt Community Hall chu khuallian niin a hawng. He hall hi NEDP atanga sum hmuh cheng vaibelchhe 7 hmanga sak a ni.

Chief Minister chuan sawrkar hmasain a sakna tur sum ruahman a bul a lo tan tawh community hall changtlung tak siam vawiina hawn a ni ta chu lawmawm tiin, khawtlang tana tangkai tak a nih ngei a duhsak thu a sawi a. A hmunhma an hman tangkai dan te lawmawm tiin, hripui lengin hnathawh ti khaihlak deuh mahse tha taka chhuah a ni chu a lawmpui thu a sawi. Chief Minister chuan Mizote vanneihna chu 'community' anga inhlawmfel taka awm hi a ni tiin, hetia mipui inphuarkhawm that hian ram leh hnam a ti chak a ni a ti a. Chumi tur chuan inhmuh tam a inkhawm tam a pawimawh a ni tiin, community hall hman tangkai dan te hi kan hnam ziarang pawimawh tak lanchhuahna a nih thu a sawi.

Zarkawt Community Hall sa tur hian Suvidha Infrastructure, Upper Khatla, Aizawl chu contractor a thlan a ni a. October 4, 2018 khan kut thlak tan niin, January 31,  2023 khan zawh fel a ni. Chhawng nga a sak niin chhawng tin zau zawng belhkhawm hi 1382.80 Sq.m a zau a ni a. Basement 3 ah chowkidar quarter  Basement 2 ah Multipurpose Hall, Basement 1 leh ground floor ah lirthei dahna, first floor ah mi 210 leng Multipurpose Hall, second floor ah court hnih awmna badminton hall siam a ni.

Hall hawn puala inkhawmah hian bialtu MLA C. Lalmuanpuia, Veterinary, Fishery & Sericulture Board Vice Chairman leh Hachhek bialtu MLA Lalrindika Ralte te an tel bawk.