Aizawl September 24, 2024 : MNF General Secretary Er. K. Lalsawmvela chuan Kawnpui leh Khamrang inkar kawng chhiat chungchanga Chief Minister Lalduhoma'n MCS Khawmpuia a thusawi chu hrechiang se a sawi a rin loh thu leh a sawi awm lo sawia a ngaih thu a sawi.

Vawiina chanchinthar lakhawmtute MNF ten an hmachhawn naah Er. Lalsawmvela chuan, "Chief Minister Lalduhoma hian MCS khawpuiah hian, 'He kawng hi Sadguru thawh a ni a, an liability nakuma tawp tur a ni. Kum 5 chhung maintain nan nuai 12 agreement- ah ziah a ni, engtinnge kum 5 chhung nuai 12-in an repair theih ang? Khatiang agreement kha a ni kan sign pui thin. Sawrkar chan chhe sa ranin, contractor duhsak sa ranin, hlawkna chu tem ve, chan tlan duhna avangin, contractor lamah officer tam tak kan tang thin, hei hi tawp rawh se; kan Sawrkar hnuah contractor hamthatna rawngkai agreement siam an awm chuan action kan la dawn, hei hi a tawp hmak tur a ni," tiin a sawi a.

MNF GS chuan, "A video pawh hmuh theihin a awm. Pu Duha hi ‘Opposition emaw a la inti a mawni chu aw’ tih turin, Paberin a hnuaia officer te thil awmdan zawt chiang hmasa lova, Engineer ho rilru tina zawnga hetianga sawi mai hi a pawi ka ti hle a. State Service pakhat kalkhawm hmaah service dang officer te hetianga hotupa berin a sawisel hi thil tih awm loh tak a niin, a hmain lo zawt chiang se, thil awmdan hrechiang seng chuan tiang hian a sawi ka ring lo. A sawitu hi hetiang sawi tur hian a inhmehlo ka ti hle a ni," a ti.

Kan CM hian opposition anih lai khan, “Kan Sawrkar hunah chuan contract hna reng reng EPC mode veka tih a ni ang,” tih a sawi thin a. EPC mode hi NH atan chuan State PWD hian 2018 atang khan a lo hmang daih tawh a. An Sawrkar hnua tender Department pali a mite chu EPC mode hman lohna vek an ni thung. Tuna mi, Kawnpui-Khamrang (Km.118-133) pawh hi a kawng neitu leh sum petu Ministry of Road Transport & Highways (MoRT&H) duhdan a EPC mode contract a niin, tender document leh Contract Agreement pawh EPC kalphung ang takin kalpui a ni; PWD hian dan an bawhchhiatna a awm lo," a ti bawk.

K. Lalsawmvela chuan State PWD hian an duh danin contract document hi an ti danglam ngai lo a ti a. MoRT&H standard document hi an hmang mai thin a. Kawnpui-Khamrang bik Defect liability period chhunga maintenance atana pawisa dah (1% of contract agreement amount of Rs.1178 lakhs) = Rs.11.78 lakhs pawh hi EPC guideline ang chiah a ni a; contractor duhsak vang emaw, hlawkna tem ve a, chan ve duh vang emaw a he agreement hi PWD officer te hian ziak an ni lo tih a sawi.