To,

     Lalduhoma,

    Mizoram Chief Minister

Pu zahawm tak,

I hnena ka thu rawn thlen hi keimah mimalin ka ngaih pawimawh vang mai ni lovin Mizoram mipui zawng zawngte leh Mizoram hmasawnna atan pawh a a pawimawh em avangin lehkhathawn pangngai mai anga rawn thawn atan chuan a uiawm mai ni lovin Mizoram mipui, a tam thei ang berin lo hre nghalin an ngaihtuahna te lo hmang ve nghal sela a that ka rin avangin “OPEN LETTER” in ka rawn thawn che a, i lo hriatthiam ka beisei. Mizoram leh a chhunga mipuite tan a pawimawh em avangin thuruk engmah awm lo a, a tu-a-te pawhin thu kallam leh hawlam a bul atanga a tawp thlenga kan hriat vek hi a tul a ka hriat avanga Open Letter-a rawn thawn che ka ni.

Lengpui thlawhna tumhmun hi Mizoram a “operational airport” awm­chhun a ni a, kan neih chhun liau liau a ni tih chu nang hi a hre chiang bertu tur zing ami i ni. Mizoram State awmna hi India ram State zawng zawngte zinga kilkhawr ber leh ramdang nena inri, a ram zau zawnga chhuta ramdang nena ramri nei thui ber kan ni a. Chuvangin, India ram hmun dang a mite ai a kilkhawr ber kan ni tih hi hai rual a ni lo. He dinhmun avang hian kan ram hruaitu hmasa, a bik takin Brig. T.Sailo, Pu Laldenga, Pu Lal Thanhawla te leh Pu Zoramthanga-te pawhin inkal pawh harsatna kan neih sut kianna atan kum tam tak atang tawh khan thlawhna tumhmun tha leh changtlung Mizoram in kan neih theih na'n theihpa tawp chhuaha hma an lo lak avanga, Lengpui Airport hi December ni 12, 1998 atanga lo nei ve kan ni a. India ram chanchinah state a politik hruaitute hmalak (initiative) tanna rah liau liau a ni tih hi tuma hai rual a ni lo. India ram State zawng zawng zingah khawi State political hruai­tute mahin hetiang hian hma an lak ve loh avangin mahni ta liau liau thlawh tumhmun, State sorkarin a, a SURVEYED, CONSTRUCTED, OPERATIONALIZED sawi tur dang pakhat mah a awm lo.

Hei hi thil awmdan a ni a. AVIATION hi India ramah chuan CONCURRENT LIST a awm a ni chungin kan ram hruaitu hmasate'n rual awhna avanga an lo sual chhuak thei hi an fakawm takzet a ni. An thawh rah hi thenawm State - Meghalaya, Nagaland, Arunachal-te leh Sikkim-te pawhin an awh ve em avangin Mizoram-a Aviation enkawltute pawh kum 2003 hnu lam atang khan chuan a rawn berawn reng a ni tih hi tlang hriat a ni. Tunah pawh hian Meghalaya chuan an neih chhun Umroi Airport kham khawp lovin tih changtlung an tumna, Airports Authority of India (AAI)-in an tih hlawhtling sak duh loh avangin Meghalaya High Court-ah Public-Interest-Litigation (PIL) thehlutin AAI an nawr mek a ni. High-Court thupek chu AAI in bawhzuiin, cheng vaibelchhe 600 sengin Umroi Airport chu thlawhna lian zawk tum theihna turin a tihlena an tihchangtlun theih thu report an thehlut tawh a. Nagaland sorkara transport secretary pawhin Dimapur Airport an kham khawp tawh loh avangin thlawhna tumhmun thar, Cheethu ramah cheng vaibelchhe 8,000 senga siam tuma hma an lak thu te hriat a ni.

Hei hi Lengpui Airport chhuan­awm zia leh thenawm State-te'n a kan hotu hmasate thawh rah an awhzia hai rual lo a ti langtu a ni. Hei hi Lengpui Airport dinhmun dik tak a nih laiin engvang tehlulin nge Indian Air Force (IAF) hnena hlan duhna hi a lo pian chhuah? India ram chanchinah mipui hman mek (civil airport) a Airline Service a that tawk loh vanga, a lo that zawk beiseina avanga IAF hnena an thlawhna tumhmun hlan tawh pakhat tal sawi tur i hria em? I mumangah pawh i la hmu lovang. India hmarchhak bial atang pawhin Kumbhirgram (Silchar), Tezpur, Jorhat, Chabua, IAF Airport-te hi Lengpui Airport ai a kum tam taka upa leh sum tam tak senna thlawhna tumhmunte hian, hmang tangkaitu mipui lut leh chhuak tam lamah te leh navigational/landing aids lamah te Lengpui Airport hi an phak lo hle a ni tih an hrilh lo che em ni Zir Chiang­tu Committee hian?

Engpawh nise khawngaih takin a hnuaia ka zawhnate hi min hrilhfiah theih chuan a lawmawm ngawt ang:

(1) Lengpui Airport hi IAF hnena hlan duhna chhan hi sum leh pai harsatna vang a ni em? A nih chuan i sorkar hian sum leh pai harsatna sukiang tur hian AAI/Aviation Ministry/ NEC/ DoNER Ministry-ah emaw, Home Ministry-ah emaw dilna a siam tawh em, engzat nge dil a nih a, enge a chhanna in hmuh?

(2) I sorkarin dilna a siam tawh a, a hlawhchham a nih pawhin beidawng mai lova thuneitu sang zawk, a tul a nih chuan Prime Minister thleng pawh a ngenngawl taka nawr zuite hi tih tumna a awmlo em ni? Pu Laldenga kha chuan D.O. Letter mai nilovin Prime Minister kha vawihnih a hmu ni a report a ni. A nih loh pawhin Meghalaya tih dan anga PIL File ve tumna a awm em? A awm lo a nih chuan engvanga beidawng mai nge kan nih? Khasi/Garo ho tih ngam pawh kan ti ngam ve dawn lo a va ang ve.

(3) Zir chiang tura din committee chairman hian (thlawhna leh thlawhna tumhmun chungchang (aviation subject)-ah hian engnge a thiamna leh tawnhriat? Zir chiang tura Committee hian eng chiah nge ni an zirchian? Thenawm state-te'n a min awh em em lai a Defence Ministry hnena Passenger Airline Service a that zawk beiseina avanga IAF hnena hlan/hralh han tum ngawt mai chu mithiam chinte tan chuan han hriatthiam chi a ni mawlh lo. IAF hian khawiah mah Civil Airport-ah Passenger Service a lo that zawkna tura hma an lakna sawi tur pakhat tal i hria em?.

(4) Ka Pu, ka rawn ngen duh che chu IAF hnena Lengpui Airport hlan tumna hi a ruk te a, hmanhmawh thlakna riau a awm a nih si loh chuan Mizoram mipui zawng zawng nghawng thei thil a nih avangin Political Party dangte pawh rawn ve a sawipui ve hnu a thutlukna siam hi a dik zawk i ti ve lo maw?

 F Lalbiakzama,

Tuikual South