ZALEN August 27, 2026 :Vawiin Assembly Session-a Chief Minister Lalduhoma'n Mizo Peace accord chungchangah Mizo National Front te chu debate puiah a sawm.

MNF MLA Dr. R. Lalthangliana'n calling attention motion a putluhah, tunhnaia Law Minister ni bawk, Chief Minister Lalduhoma'n Govt. Mizoram Law College-a thu a sawinaah kum 1966-a Memorandum of Settlement sign chu Mizoram leh India inremna ni lovin Mziorama party pakhat leh Home Ministry inremna a ni a, a ropui tehchiam lo tia a sawi chuan Mizote inkara inhnialna a siam a, hei hi reh tawh se a tih thu a sawi. 

Hemi chungchang hi House Leader, Chief Minister chuan chhangin, hemi chungchang hi engtiklai pawhin an sawifiah thei reng a ti a, hemi chungchang hi an sawi fo dawn a nih chuan Mizoram mipuite chuan thudik an hriat theih nan MNF chu an party atangin an duh ber thlang chhuak se, amah nena debate neihpui turin rawtna a siam tih a sawi.

CM chuan MNF party ten remna ni an hmannaah pawh MNF leh India inremna an tih a thu a sawi a, President Zoramthanga leh Laldenga fanu te pawhin MNF leh India inremna tia an sawi an huat loh laia ama sawi an haw ta bik chu a hriatthiam loh thu a sawi bawk a ni.

Inner Line Regulation chu Article 371g vanga lo awm thar thut a nilo a, kum 153 liamta ah kan lo neih daih tawh a, Bengal Eastern Frontier Regulation of 1873 ah khan a lo awm daih tawh a ni a ti.